پاکستان اور ویسٹ انڈیز کے درمیان سیریز کے پہلے ٹی ٹوئنٹی میچ میں پاکستان نے ویسٹ انڈیز کو 63 رنز سے شکست دے دی ہے۔

تفصیلات کے مطابق مہمان ٹیم  نے ٹاس جیت کر پہلے پاکستان کو بیٹنگ کی دعوت دی۔

پاکستان نے مقررہ 20 اوورز میں  6 وکٹوں کے نقصان پر 200 رنز بنائے۔

پاکستان کی جانب سے  محمد رضوان نے شاندار کارکردگی کا مظاہرہ کرتے ہوئے 78 رنز بنائے ان کی اننگ میں 10 چوکے شامل تھے،حیدر علی 68،محمد نواز نے ناقابل شکست 30 رنز بنائے جبکہ کپتان بابر اعظم بغیر کھاتہ کھولے ہی پویلین لوٹ گئے۔

ویسٹ انڈیز کی جانب سے روماریو شیفرڈ نے 2 جبکہ اکیل حسین،اوشان تھومس اور ڈومنک ڈریکس نے 1،1 وکٹ حاصل کی۔

ہدف کے تعاقب  میں ویسٹ انڈیز کی  ٹیم  19 اوورز میں 137 رنز بنا کر آل آؤٹ ہو گئی۔

ویسٹ انڈیز کی جانب سے شائی ہوپ 31 رنز بنا کر نمایاں بیٹسمین رہے،اوڈین اسمتھ 24،رومن پوول 23 جبکہ کپتان نکولس پورن نے 18 رنز بنائے۔

پاکستان کی جانب سے  محمد وسیم جونیئر نے شاندار بولنگ کرتے ہوئے 4 کھلاڑیوں کو پویلین کی راہ دکھائی،شاداب خان نے 3 وکٹیں حاصل کیں جبکہ شاہین آفریدی،حارث رؤف اور محمد نواز نے 1،1 وکٹ حاصل کی۔