بچوں کی غذائیت کے مسائل  سے نمٹنے کیلئے وزارت صحت نے بڑا فیصلہ  کرتے ہوئے ماں کا دودھ ترجیح بنانے کیلئے 2002 کے آرڈیننس میں ترمیم کا مسودہ تیار کرلیا۔

مسودے کے مطابق بچوں کے دودھ کے بازاری متبادل ڈبے پر دودھ کا لفظ نہیں لکھا جائیگا اور لکھنا ہوگا یہ ماں کے دودھ کا متبادل نہیں اور ڈبے پر لکھ کر ماں کے دودھ کی دو سال تک اہمیت بتانا لازم ہوگا جب کہ نومولود کیلئے فارمولا دودھ کو صرف ڈاکٹر کی تجویز سے مشروط کرنا بھی ڈرافٹ میں شامل ہے۔

اس کے علاوہ فارمولا دودھ کی دستیابی صرف فارمیسیز تک محدود کرنے اور دودھ کا متبادل بنانے والی کمپنیوں کی سوشل میڈیا مارکیٹنگ پر بھی پابندی کی تجویز دی گئی ہے۔

بازاری ڈبے پر ایسی کوئی تصویر نہیں لگے گی جو 6 ماہ تک کے بچے کو متبادل دودھ کی ترغیب دے، لیبل پر یہ لکھنا بھی لازم ہو گا کہ یہ حلال ہے.

بازاری دودھ کے مارکیٹنگ نمائندوں کے ہیلتھ کیئر سینٹرز پر وزٹ کرنے پر بھی پابندی کی تجویز  ہے جبکہ دودھ کا متبادل بنانے والی کمپنیوں کیلئے منافع کا دو فیصد ماں کے دودھ کی افادیت اجاگر کرنے پر خرچ کرنا لازم ہوگا۔