پیپلزپارٹی کی سینئر رہنما ڈاکٹر نفیسہ شاہ نے کہا ہے کہ ملک میں جنگجووں کی حکومت ہے۔

 نفیسہ شاہ نے اساتذہ دھرنے سے خطاب  کرتے ہوئے کہا کہ معزز پیشہ کے اساتذہ کو سڑکوں پر دیکھ کر دکھ ہوتا ہے، میں اور میری پارٹی آپکے ساتھ کھڑے ہیں۔

پی پی پی رہنما ایم این اے نے کہا کہ استاد ہمارے لیے محترم ہیں، جو معاشرہ ٹیچرز کی عزت نہیں کرتا وہ برباد ہوجاتا ہے۔

ان کا کہنا تھا کہ اسلام آباد ایسا شہر ہے جہاں ہر کسی کی خواہش ہوتی ہے اسکے بچے سرکاری اسکول میں داخل ہوں مگر افسوس قابل احترام اساتذہ سڑک پر بیٹھے ہیں

ڈاکٹر نفیسہ شاہ نے کہا کہ ملک میں جنگجووں کی حکومت ہے ، اسی حکومت کے لیڈروں نے پارلیمنٹ اور پی ٹی وی پر حملہ کروایا۔

پیپلزپارٹی کی سینئر رہنما کا کہنا تھا کہ کل اجلاس بلا کر موخر کردیا، یہ حکمران پارلیمان سے بھی ڈرتے ہیں۔ ان حکمرانوں نے غربت کی بجائے غریب سے جنگ کی۔

نفیسہ شاہ نے کہا کہ پیشہ ور سرکاری ملازمین کو انھوں نے تنگ کررکھا ہے جبکہ فیڈرل تعلیمی اداروں کو ایسے ادارے کے ماتحت کررہے ہیں جس کا میئر ہی نہیں۔

پیپلزپارٹی کی سینئر رہنما ڈاکٹر نفیسہ شاہ کا مزید کہنا تھا کہ ان حکمرانوں کی پیکنگ شروع ہوچکی، یہ جلد جانے والے ہیں، انکا آگے مزید برا حشر ہونے والا ہے یہ اب الیکشن سے بھاگیں گے۔