سانحہ سیالکوٹ میں سری لنکن شہری پریانتھا کمارا دیاودنا کے قتل کیس میں اہم پیشرفت ہوئی ہے، پولیس نے پریانتھا کی لاش کی بے حرمتی میں ملوث انتہائی مطلوب ملزم امتیاز عرف بلی کو گرفتار کرلیا ہے۔

پنجاب پولیس نے ٹوئٹر پر جاری ایک پیغام میں اطلاع دی کہ گرفتار ملزم امتیاز عرف بلی کو راولپنڈی جانے والی بس سے گرفتار کرلیا گیا ہے، ملزم سری لنکن مینیجر پر تشدد اور لاش کی بے حرمتی میں شامل تھا۔

یہ بھی پڑھیں: مقتول سری لنکن شہری کی پوسٹ مارٹم رپورٹ میں دل دہلا دینے والے انکشافات

پولیس کا کہنا ہے کہ مزید آٹھ ملزمان کو سی سی ٹی وی فوٹیج اور موبائل کالز ڈیٹا کی مدد سے گرفتار کر لیا گیا ہے، جس کے بعد زیر حراست ملزمان کی تعداد 131 ہوگئی ہے۔

ترجمان پولیس کا کہنا ہے کہ تحقیقات میں زیرِ حراست 26 ملزمان کا مرکزی کردار سامنے آیا ہے۔

پولیس نے انتہائی مطلوب ملزم امتیاز عرف بلی کو بھی گرفتار کر لیا ہے سری لنکن شہری پر تشدد کرنے اور نعش کی بے حرمتی کرنے میں شامل تھا ملزم کی گرفتاری کے لیے متعدد مقامات پر چھاپے مارے مگر وہ ہر بار اپنا ٹھکانہ تبدیل کرلیتا,ملزم کو راولپنڈی جانے والی بس سے گرفتار کیا گیا#Sialkot https://www.bolnews.com/urdu/latest/2021/12/987481/amp/ pic.twitter.com/nYXuwq3fld

— Punjab Police Official (@OfficialDPRPP) December 6, 2021

خیال رہے کہ 3 دسمبر 2021 کو سیالکوٹ میں واقع اسپورٹس گارمنٹ فیکٹری کے غیر ملکی مینیجر پریانتھا کمارا دیاودنا کو مذبی پوسٹر اتارنے کے الزام میں ہجوم نے تشدد کا نشانہ بنایا اور ہلاکت کے بعد لاش کو آگ لگا دی۔

ملک کی تمام مذہبی جماعتوں اور اعلیٰ حکام کی جانب سے اس افسوسناک واقعے کی شدید الفاظ میں مذمت کی گئی ہے اور اسے انسانیت سے  عاری اور ملک کیلئے شرمناک واقعہ قرار دے کے ملزمان کو کڑی سزا دینے پر زور دیا گیا ہے۔