وزیراعظم نے وفاقی کابینہ کا اجلاس 4 جنوری بروز منگل کو وزیراعظم ہاؤس میں طلب کر لیا۔

وزیراعظم ہاؤس میں ہونے والےوفاقی کابینہ کے اجلاس میں ملکی سیاسی، معاشی صورتحال پر غور ہوگا۔ اجلاس میں کورونا وائرس سمیت ای وی ایم پر بریفنگ ہوگی۔

وفاقی کابینہ کے اجلاس کا 7 نکاتی ایجنڈا جاری کر دیا گیا ہے۔ اجلاس میں پاکستان برطانیہ کے درمیان ملزمان کی حوالگی پر بات ہونے کا امکان ہے۔

وفاقی کابینہ کے اجلاس میں ملزم عبدالقادراحسان کی پاکستان سے یو کے حوالگی کی سمری پیش ہوگی۔ سمری وزارت داخلہ کی جانب سے پیش کی جائے گی۔

 کابینہ اجلاس میں نیشنل انسٹیٹیوٹ آف انٹیلی جینس اینڈ سیکیورٹی سٹڈیز کے قیام کی سمری بھی پیش ہوگی۔ قائد اعظم یونیورسٹی اسلام آباد میں نیشنل انسٹیٹیوٹ آف انٹیلی جینس اینڈ سیکیورٹی سٹڈیز کی قیام کی تجویز ہے۔

کراچی پورٹ ٹرسٹ کے چیئرمین کی دو سال کے لیے تقرری کی منظوری کا ایجنڈا بھی کابینہ کے اجلاس میں  شامل ہے۔

پاکستان ٹوبیکو بورڈ کے نوٹیفکیشن کی منظوری، پاکستان ادارہ شماریات میں 3 ممبران کی تقرری کا معاملہ بھی کابینہ کے ایجنڈے کا حصہ ہے۔

سی پیک اتھارٹی اور چینی وزارت ماحولیات کے درمیان مفاہمتی یاداشت کی ایکس پوسٹ فیکٹو منظوری اور رواں مالی سال کے گذشتہ چھ ماہ میں اضافی اخراجات کی اسٹیٹمنٹ جاری کرنے کی منظوری بھی ایجنڈے میں شامل ہوگی۔