یہ خط جرمنی سےلکھا گیا تھا جو میساچیوسیٹس میں اس کی اہلیہ نے وصول کیا ہے۔ امریکی پوسٹل سروس کے مطابق یہ خط 1945 میں جان گونسیلیوس نے اپنی والدہ کو لکھا تھا۔ جو ان تک نہ پہنچ سکا اور کئی عشروں بعد اب دوبارہ اس پر نظر گئی تو سابقہ امریکی فوجی کے لواحقین کی بھرپور تلاش شروع کی گئی۔

خط لکھتے وقت سپاہی کی عمر 22 برس تھی لیکن جب یہ خط برآمد ہوا تو اس کی ماں کئی برس قبل انتقال کرگئی تھیں اور خود جان گونسیلیوس بھی 2015 میں اس دنیا سے رخصت ہوگئے تھے۔ لیکن محکمہ ڈاک نے فوجی کی بیوہ اینجلینا جین کو ڈھونڈ نکالا اور یہ خط اس کے حوالے کردیا۔ وہ اپنی ساس کے نام لکھے گئے تاریخی خط کو دیکھ کر آبدیدہ ہوگئیں۔ اس طرح 76 سال بعد ایک خط اپنے اصل ٹھکانے تک پہنچ گیا۔

اینجلینا نے اخباری نمائیندوں کو بتایا کہ یہ ایک بہت خوشگوار لمحہ ہے جس پر مجھے یقین نہیں آرہا اور خط پاکر انہیں محسوس ہوا ہے کہ گویا ان کے شوہر اب بھی ان کے ساتھ ہیں۔