شمالی کوریا نے ہفتے میں دوسری بار ممکنہ طور پر بلیسٹک یا ہائپر سونک میزائل کا تجربہ کیا ہے۔

غیر ملکی خبر رساں ایجنسی کے مطابق جاپان اور جنوبی کوریا نے دعوی کیا ہے کہ منگل کی صبح شمالی کوریا کی جانب سے ایک بلیسٹک میزائل یا کسی ہائپر سونک ہتھیار کا تجربہ کیا گیا ہے۔ جو کہ اس ہفتے میں ہونے والا دوسرا تجربہ ہے۔ 5 جنوری کو بھی شمالی کوریا نے کامیاب ہائپر سونک میزائل تجربہ کرنے کا دعوی کیا تھا۔

جنوبی کوریا کے جوائنٹ چیف آف اسٹاف نے سیول سے جاری بیان میں کہا ہے کہ ہماری افواج نے ممکنہ طور پر آج صبح 7:27 پر شمالی کوریا کی جانب سے زمین سے مشرقی سمندر میں میزائل فائر کیے جانے کی مشتبہ سرگرمیوں کی شناخت کی گئی ہے۔

جاپان کی کیوڈو نیوز ایجنسی کے مطابق اس واقعے کو جاپانی کوسٹ گارڈ نے بھی رپورٹ کیا ہے جس کے مطابق انہوں نے شمالی کوریا کی جانب سے بیلسٹک میزائل نما کوئی چیز فائر کیے جانے کا مشاہدہ کیا ہے۔

نیوز ایجنسی نے سرکاری حکام کے حوالے سے بتایا کہ یہ گولہ جاپان کے خصوصی اقتصادی زون کی حدود سے باہر سمندر میں گرا۔ جاپانی وزیر اعظم فیومیو کشیدا نے میڈیا سے گفتگو کرتے ہوئے کہا کہ شمالی کوریا مستقل میزائل فائر کر رہا ہے اور اس کی یہ حرکت قابل افسوس ہے۔

جب کہ جنوبی کوریا کی جانب سے صدارتی محل بلیو ہاؤس میں ہونے والی قومی سلامتی کونسل کی ہنگامی میٹنگ میں شمالی کوریا کے اس میزائل تجربے کی بھرپور مذمت کی گئی۔