سعید غنی نے کہا ہے کہ حکومت کی نااہلی کی وجہ سے مہنگائی عروج پر ہے۔

وزیراطلاعات سندھ سعید غنی نے میڈیا سے گفتگو کرتے ہوئے کہا ہے کہ 24 جنوری کو پیپلزپارٹی کا ملیر سے مارچ ہوگا۔

انہوں نے کہا کہ کراچی کے کسان بھی حکومت کے خلاف احتجاج کریں گے ، حکومت میں بیٹھے ترجمان کہتے ہیں مہنگائی نہیں ہے ، حکومت کی نااہلی کی وجہ سے مہنگائی عروج پر ہے۔

سعید غنی نے کہا ہے کہ پاکستان میں بےروزگاری میں اضافہ ہوا ہے ، عام آدمی کے استعمال کی ہر چیز مہنگی ہوتی جارہی ہے ، مہنگائی حکومت کی نااہلی اور کرپشن کی وجہ سے ہے۔

وزیراطلاعات سندھ نے کہا کہ بلدیاتی قانون کو جواز بنا کر تماشا لگایا جارہا ہے۔

واضح رہے کہ گزشتہ روز ادارہ شماریات کی جانب سے جاری کر دہ رپورٹ کے مطابق  گزشتہ ہفتے مہنگائی کی مجموعی شرح 19.36 فیصد ریکارڈ کی گئی۔

جاری کردہ رپورٹ کے مطابق کم آمدنی والے افراد کے لیے مہنگائی کی شرح 20.85 فیصد کی سطح پر موجود ہے ، حالیہ ہفتے میں 24 اشیائے ضروریہ کی قیمتوں میں اضافہ ریکارڈ کیا گیا ہے۔

ادارہ شماریات کے مطابق ایک ہفتے میں ٹماٹر 15 روپے 69 پیسے فی کلومہنگے ہوگئے ، ٹماٹر کی فی کلو قیمت 60 روپے 18 پیسے ہوگئی جبکہ لہسن 10 روپے 95 پیسے فی کلو مہنگا ہو گیا ہے۔

دال چنا 2 روپے 44پیسے فی کلو مہنگی ، آٹے کا بیس کلو کا تھیلا 3 روپے 12پیسے فی کلو مہنگاہوا، حالیہ ہفتے میں چاول،کوکنگ آئل اور تازہ دودھ مہنگا ہوا ہے۔

بیف 9 روپے 26 پیسے فی کلو ،مٹن 17 روپے فی کلو مہنگا ہوا ہے۔

 جاری کردہ رپورٹ کے مطابق ڈیزل 2 روپے98 پیسے اور پیٹرول  3 روپے ایک پیسے فی لٹر اور ایل پی جی کا گھریلوسلنڈر بھی مہنگا ہوا ہے۔

ادارہ شماریات کے مطابق ایک ہفتے میں 7 اشیائے ضروریہ کی قیتموں میں کمی ہوئی ہے جن میں حالیہ ہفتے برائلر مرغی 15 روپے 71 پیسے فی کلو سستی ہوئی ، پیاز 1 روپے 88 پیسے،آلو 81 پیسے فی کلو سستے ہوئے۔

ایک ہفتے میں انڈے 2 روپے 98 پیسے فی کلو سستے ہوئے جبکہ حالیہ ہفتے میں چینی 36 پیسے فی کلو سستی ہوئی ، چینی کی فی کلو قیمت 92 روپے 22 پیسے فی کلو ہوگئی ہے۔

اس کے علاوہ ادارہ شماریات کے مطابق حالیہ ہفتے میں 20 اشیائے ضروریہ کی قیمتوں می استحکام رہا۔