بھارت میں دلہن کی بالی ووڈ گانے پر رقص کے ساتھ انٹری کی ویڈیو وائرل ہوگئی۔ 

دنیا بھر میں ان دنوں شادیوں کا سیزن چل رہا ہے اور انٹرنیٹ پر شادیوں میں دلہا اور دلہن کی انٹری کی ویڈیوز کی بھرمار ہے ، اپنی شادی کو منفرد بنانے کے لیے دلہن کوئی نیا طریقہ ڈھونڈ لاتی ہے اور لوگوں کی توجہ حاصل کرنے میں کامیاب ہوجاتی ہے۔

سوشل میڈیا پر وائرل ہونے والی اس ویڈیو میں دلہن نے سب سے منفرد طریقہ آزمایا اور اپنے دلہے کو سرپرائز انٹری دے کر حیران کردیا جب کہ ویڈیو بھی چند ہی سیکنڈوں میں وائرل ہوگئی۔

یہ بھی پڑھیں؛ ایئرہوسٹس دلہن گھوڑی چڑھ کر خود دولہے کو لینے پہنچ گئی

ویڈنگ کوریوگرافر کی جانب سے انسٹاگرام پر اپ لوڈ کی گئی ویڈیو میں صبا کپور نامی بھارتی دلہن نے خوبصورت لہنگا پہن رکھا ہے اور وہ 2016 میں ریلیز ہونے والی فلم ’بار بار دیکھو‘ کے گانے ’’سو آسمانوں کو اور دو جہانوں کو چھوڑ کے آئی تیرے پاس‘‘ پر ڈانس کرتے ہوئے انٹری دے رہی ہیں۔

ویڈیو میں دیکھا جاسکتا ہے کہ وہ کارپیٹ پر ڈانس کرتے ہوئے انٹری دے اور اس دوران ان کے دوست اور کزن ایک قطار بناکر ان کا ساتھ دے رہے ہیں اور جیسے جیسے وہ آگے بڑھ رہی ہیں ، آگے موجود ایک جوڑا ان کا استقبال کرتا ہے اور ڈانس کرتے ہوئے ان کے ساتھ آگے بڑھ جاتا ہے۔

دوسری جانب دولہے میاں دوسرے کنارے پر موجود اپنی دلہن کی انٹری کو انجوائے کررہے ہوتے ہیں اور جیسے ہی دلہن قریب آتی ہیں ، دلہا فوراً اسے گلے لگالیتا ہے اور آخر میں خود بھی گانے پر دلہن کے ہمراہ رقص کرتا ہوا دکھائی دیتا ہے۔

ویڈیو کے آخر میں جیسے ہی گانے کا اختتام ہونے لگتا ہے ، دلہن اپنے لہنگے میں چھپائی ہوئی انگوٹھی نکالتی ہیں اور گھٹنوں کے بل بیٹھ کر دلہے کی جانب بڑھا دیتی ہیں۔