جنوبی افریقہ کے لیجنڈ بلے باز ہاشم آملہ کا کہنا ہے کہ پورے کیرئیر میں پاکستان کے محمد آصف جیسی جادوئی بولنگ کبھی نہیں دیکھی۔

تفصیلات کے مطابق جنوبی افریقہ اور بھارت کے درمیان کھیلی جا رہی سیریز کے دوران کمنٹیٹر نے لیجنڈ پروٹیز بلے باز ہاشم آملہ سے سوال کیا کہ آپ کے کیرئیر میں کس بولر نے اپنی تکنیک اور بولنگ سے آپ کو پریشان کیا۔ہاشم آملہ نے پاکستان کے محمد آصف کا نام لیتے ہوئے کہا کہ وہ ایک جادوگر بولر تھے، آصف جب گیند کو ڈلیور کرتے تھے تو یہ پتہ ہی نہیں چلتا تھا کہ گیند اندر کی جانب آئے گی یا باہر کی جانب۔

سابق جنوبی افریقی بلے باز کا کہنا تھا کہ آصف گیند کو بہت ہی مہارت سے اوپر اٹھاتے تھے، میں گیند کو چھوڑنے کے لیے بلا اوپر اٹھاتا تھا تو کبھی گیند اندر آکر بلے کو چھوتے ہوئے چلی جاتی تھی اور کبھی گیند اتنی اوپر اٹھ جاتی تھی کہ ایج نکل جاتا تھا۔