سندھ کی نجی میڈیکل جامعات نے پی ایم سی کے بعد صوبائی داخلہ پالیسی کو بھی ردی کی ٹوکری میں ڈال دیا۔

سندھ بیشتر نجی میڈیکل جامعات نے خود ساختہ طور پر داخلے دے دیے اور طلباء پر فیس جمع کرانے کے لیے دباؤ ڈال رہے ہیں جب کہ سندھ کی نجی میڈیکل جامعات نے طلباء سے خود ساختہ وصول کیے فارم کے کروڑوں روپے بھی ری فنڈ نہ کیے۔

خیال رہے سندھ حکومت نے نجی میڈیکل جامعات کے داخلے جناح سندھ میڈیکل یونیورسٹی کے تحت کرنے کا اعلان کیا تھا۔

جناح سندھ میڈیکل یونیورسٹی نے نجی میڈیکل کالجز کے داخلہ فارم 5 جنوری سے 20 جنوری تک وصول کیے ، جناح سندھ میڈیکل یونیورسٹی کی اسکروٹنی کا عمل مکمل ہونے سے قبل ہی نجی میڈیکل جامعات نے خود ساختہ طور پر داخلہ فہرست جاری کر دی ہے۔

ہزاروں طلباء سے نجی میڈیکل جامعات نے سرکاری جامعہ کی اسکروٹنی کا عمل مکمل ہونے سے قبل ہی لاکھوں روپے فیس وصول کرلی ہے ، نجی میڈیکل جامعات کی جانب سے طلباء کو ای میل کے ذریعے آفر لیٹر بھی جاری کر دیے گئے۔

جناح سندھ میڈیکل یونیورسٹی کے تحت نجی میڈیکل کالجز و جامعات میں داخلے کیلئے اہل طلباء کی فہرست 25 جنوری کو جاری ہوگی ، جامعہ کو ایم بی بی ایس اور بی ڈی ایس پروگرام میں داخلے کیلئے کل 11ہزار کے قریب درخواستیں موصول ہوئیں اور اسکروٹنی کا عمل جاری ہے۔

دوسری جانب وائس چانسلر پروفیسر شاہد رسول نے کہا کہ سندھ کے طلباء کو ترجیح دینگے، داخلے کے عمل میں شفافیت و میرٹ کو ہر صورت یقینی بنایا جائے گا۔

ادھر ڈاکٹر فاطمہ عابد کا کہنا تھا کہ نجی میڈیکل کالجز و جامعات میں کل 1940 نشستوں پر کامیاب امیدواروں کی میرٹ لسٹ جلد جاری کریں گے۔