وزیراعظم کے معاون خصوصی برائے سیاسی ابلاغ ڈاکٹر شہباز گِل نے کہا ہے کہ نااہل درباری منافقت کا استعارہ بن چکے ہیں۔

ڈاکٹر شہباز گِل نے احسن اقبال کے بیان پر ردعمل دیتے ہوئے کہا کہ عوام سے مسترد ٹولہ معیشت کا ایکسپرٹ بنا ہوا ہے۔

انہوں نے کہا کہ روپے کی قدر مستحکم کرنے کیلئے ڈالر اڑانے والے معیشت پر بھاشن بازی کر رہے ہیں، نااہلوں کے دور میں صرف شریفوں اور انکے حواریوں کی معیشت مستحکم ہوئی۔

شہباز گِل نے کہا کہ ملکی معیشت 2018 میں وینٹیلیٹر پر تھی، تجارتی خسارہ 37 ارب ڈالر کی بلند تریں سطح پر چھوڑنے والے معیشت کے الف ب سے نابلد ہیں۔

انہوں نے کہا کہ ایشین ٹائیگر بنانے کے جھوٹے دعوے کرنے والوں نے ملک کو ایشین بیگر بنا کر چھوڑا تھا، نااہل درباری منافقت کا استعارہ بن چکے ہیں۔

ڈاکٹر شہباز گِل نے مزید کہا کہ وفاقی وزیر ہو کر اقامے پر پلمبر کی جاب کرنے والے آج ملکی خود مختاری کی بات کر رہے ہیں۔

 اس سے قبل مسلم لیگ (ن) کے رہنما احسن اقبال نے اسلام آباد میں میڈیا سے بات کرتے ہوئے کہا کہ وزیر اعظم تقریریں اور اپوزیشن کی کردار کشی کے علاوہ کچھ نہیں کررہے، ان کے پاس ملک چلانے کا کوئی منصوبہ نہیں ہے۔

رہنما (ن) لیگ نے کہا کہ ملک کو بد انتظامی کا جہنم بنادیا گیا ہے، سانحہ مری ان کی بد انتظامی کا منہ بولتا ثبوت ہے، مری میں سیاح ساری رات برف میں پھنسے رہے لیکن حکمران سوتے رہے اور بعض تنظیم سازی میں مصروف رہے۔

احسن اقبال نے کہا کہ نوجوان بے روزگاری کے ہاتھوں خود کشیاں کررہےہیں اور وزیر اعظم خوشحالی کی طرف جارہے ہیں۔

(ن) لیگ کے رہنما کا کہنا تھا کہ پاکستان کو کووڈ 19 کے ساتھ کووڈ18 کا بھی شکار ہے، اس کووڈ 18نے ملک میں رہنے والوں کا جینا حرام کیا ہے، ملک میں نااہلی اور نالائقی کا کورونا ہے، 99 فیصد عوام غربت کی لکیر سے نیچے چلے گئے ہیں۔