وزیراعظم عمران خان کی زیر صدارت حکومتی ترجمانوں کے اجلاس کی اندرونی کہانی سامنے آگئی۔

وزیراعظم کی زیر صدارت حکومتی ترجمانوں کا اجلاس ختم ہوگیا،اجلاس کی اندرونی کہانی سامنے آ گئی ہے جس کے مطابق وزیراعظم نے معاشی ترقی کی گروتھ 5 اعشاریہ 37 فیصد تک جانے سے آگاہ کیا۔

وزیراعظم نے کہا کہ کورونا کے باوجود معاشی ترقی کا 5 اعشاریہ 37 فیصد تک جانا بڑی کامیابی ہے.

اجلاس میں اکانومسٹ اور بلوم برگ کی تازہ رپورٹس پیش کی گئی۔

اسلام آباد ہائی کورٹ میں رانا شمیم کیس پر بھی بریفنگ دی گئی جس پر وزیراعظم نے کہا کہ ایک مخصوص مافیا عدلیہ کو دباؤ میں لانے کی کوشش میں ہے۔

انہوں نے کہا کہ یہ سب مل کر عدالتوں پر اثر انداز ہونے کی کوشش کر رہے ہیں، ججز کو دباؤ میں لا کر من پسند فیصلے لینے کی کوشش ماضی میں بھی ہوئی۔

وزیراعظم عمران خان نے کہا کہ (ن) لیگ کی عدالیہ کو دباؤ میں لانے کی تاریخ سب کے سامنے ہے۔

اس سے قبل وزیر اعظم نے کہا ہے کہ حکومت ذاتی مفاد کے لیے نہیں بلکہ عوامی فلاح کے لیے کام کررہی ہے۔

 وزیر اعظم عمران خان کی زیر صدارت راوی اربن ڈیویلپمنٹ اور سنٹرل بزنس ڈسٹرکٹ منصوبہ پر پیشرفت کے حوالے سے جائزہ اجلاس ہوا جس میں انہوں نے کہا کہ راوی اربن ڈیویلپمنٹ اور سنٹرل بزنس ڈسٹرکٹ منصوبے ملک کے لیے اہم ہیں۔

انہوں نے کہا کہ حکومت کسی ذاتی مفاد کے لیے نہیں بلکہ عوامی فلاح و بہبود کے لیے کام کررہی ہے ، یہ منصوبے لاہور میں تنگی اور آلودگی کو کم کر نے کے لیے ضروری ہیں ، منصوبوں کے اہداف  معینہ وقت پر نا پورا کرنے والے اہلکاروں کے خلاف کارروائی کی جائے۔

عمران خان نے کہا کہ ہماری حکومت نے تعمیرات کے تاریخ ساز منصوبے شروع کیے جس کی طرف پچھلے 20 سالوں میں کسی حکومت نے توجہ نا دی ، پارکس، فضلے کا سدباب، صاف توانائی اور بین الاقوامی معیار ان منصوبوں کو ماحول دوست بنائے گا۔

وزیر اعظم نے کہا کہ پنجاب حکومت ان منصوبوں کے خلاف زیر التوا مقدمات کی موثر پیروی کرے۔