محکمہ صحت تھر کی جانب سے  کورونا سے بچاؤ کےلئے گھر گھر جا کر ویکسین لگانے کا فیصلہ کیا گیا ہے۔

تفصیلات کے مطابق محکمہ صحت تھر نے یکم فروری سے 14 فروری تک کورونا سے بچاؤ کےلئے گھر گھر جا کر ویکسین لگانے کا فیصلہ کیا ہے۔

ڈسٹرکٹ ہیلتھ آفیسر تھرپارکر ڈاکٹر پیر غلام حسين نے میڈیا کو بریفنگ دیتے ہوئے کہا کہ مہم کو کامیاب بنانے کے لئے تمام انتظامات کو مکمل کیا گیا ہے، تھر ضلع میں کورونا ویکسینیشن کی مھم 24 فروری 2021کو شروع ہوئی تھی جوکہ آج تک جاری ہے۔

ڈسٹرکٹ ہیلتھ آفیسر تھرپارکر کا کہنا تھا کہ تھر میں کورونا ویکسین کے 12سال سے اوپر کے عمر کے لوگوں کا 10لاکھ بیس ہزار 588کا ٹارگٹ ہے۔

انہوں نے کہا کہ کورونا ویکسینیشن کا گھر گھر جاکر مہم کے دوران ضلع کے 4 لاکھ ایک ہزار 188لوگوں کو کورونا وبا سے محفوظ بنانے کے لیے ویکسینیشن ٹارگٹ مقرر کیا گیا ہے۔

واضح رہے کہ مہم کو کامیاب بنانے کے لیے 239ٹیمیں،44یوسیز میں 10 ضلع افسران اور سات تحصیل افسر اور 44یوسیز افسران کی مدد سے کام کیا جائے گا۔

دوسری جانب  ملک بھر میں کورونا کے پھیلاؤ نے پھر خطرے کی گھنٹی بجا دی، پہلی مرتبہ ایک دن میں 8 ہزار 183 نئے کیسزسامنے آگئے۔

نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں کے دوران مثبت کیسز کی شرح گیارہ اعشاریہ نو دو فیصد ریکارڈ کی گئی۔

این سی او سی کے مطابق کورونا وائرس سے 30 افراد جاں بحق ہوگئے، جس کے بعد اموات کی تعداد 29 ہزار 192 ہوگئی۔