مسلم لیگ (ن) پنجاب کی ترجمان عظمیٰ بخاری نے کہا ہے کہ بزدار صاحب سال بدل گیا لیکن آپکی حرکتیں اور بیانات تبدیل نہیں ہوئے۔

عظمیٰ بخاری نے عثمان بزدار کے بیان پر ردِ عمل دیتے ہوئے کہا کہ بزدار صاحب سال بدل گیا لیکن آپکی حرکتیں اور بیانات تبدیل نہیں ہوئے، عثمان بزدار حسب روایت سال کے پہلے دن بھی اتنا ہی جھوٹ بول رہے ہیں۔

ان کا کہنا تھا کہ بزدار صاحب 63 فیصد لوگوں نے آپکی کارکردگی کو انتہائی مایوس کن قرار دے دیا ہے، عثمان بزدار کو ساڑھے 3 سال سے مسلسل ذلت، رسوائی اور نالائقی کے تمغے مل رہے ہیں۔

مسلم لیگ (ن) پنجاب کی ترجمان نے کہا کہ ووٹ کو عزت دو اسی دن رسوا ہو گیا تھا جب آپکی ریموٹ کنڑول حکومت بنانے کیلئے  (ن) لیگ کے مینڈیٹ پہ ڈاکا مارا گیا تھا، آپ صرف شہباز شریف لگ سکتے ہیں لیکن شہباز شریف بن نہیں سکتے۔

انہوں نے کہا کہ یہ پنجاب کے عوام کی بد قسمتی ہے کہ عثمان بزدار جیسا ”چابی والا کھلونا“ ان پر مسلط کر دیا گیا، جس شخص کو فائلیں نہیں پڑھنی آتی وہ پنجاب کے 11 کروڑ عوام کا وزیر اعلیٰ لگا ہوا ہے۔

عظمیٰ بخاری کا کہنا تھا کہ پنجاب آج مہنگائی،غربت، بیروزگاری، آلودگی، بیڈ گورننس اور مس مینجمنٹ میں اول نمبر پر ہے، پنجاب گندم، چاول، کپاس اور چینی میں خود کفیل صوبہ ہے یہ آج چاروں چیزیں غائب ہیں۔

انہوں نے کہا کہ پنجاب کی زراعت کو سوچی سمجھی سازش کے تحت تباہ و برباد کیا جا رہا ہے۔

مسلم لیگ (ن) پنجاب کی ترجمان عظمیٰ بخاری کا مزید کہنا تھا کہ پنجاب کا کسان آج کھاد کی ایک بوری کےلئے دربدر کی ٹھوکریں کھا رہا ہے، اس وقت سب سے زیادہ جنوبی پنجاب کے کسان کھاد کےلئے ذلیل و خوار ہو رہے ہیں۔