اسلام آباد ہائی کورٹ نے کورونا کی حالیہ لہرکے پیشِ نظرنئے ایس او پیز جاری کردیے ہیں۔

اسلام آباد ہائی کورٹ کے جاری سرکلر میں کہا گیا ہے کہ درخواست دائر کرتے وقت بیان حلفی کی بائیومیٹرک تصدیق روک دی گئی۔ اسلام آبادہائیکورٹ اور ماتحت عدالتوں کے ملازمین کی بائیومیٹرک تصدیق بند رہے گی۔

عدالت کی جانب سے جاری سرکلر میں کہا گیا  ہے کہ اسلام آباد ہائیکورٹ اور ماتحت عدالتیں ہفتے میں پانچ دن کام کرینگی۔ ہفتے اور اتوار کے روز اسلام آباد ہائیکورٹ اور ماتحت عدالتیں بند رہیں گی۔

عدالت کے سرکلر کے مطابق ضمانت، حبس بے جا اور اہم نوعیت کے کیسز سماعت کیلئے مقرر کیے جائیں گے۔ کورونا کا شکار ہونے والے ملازمین پانچ روز کیلئے قرنطینہ میں رہیں گے۔

سرکلر میں عدالت نے ہدایت کی ہے کہ کورونا سے صحت یاب ہونے والے ملازمین ماسک پہنیں اور ایس او پیز پرسخت عملدرآمد کرینگے۔

دوسری جانب چیف جسٹس اسلام آباد ہائی کورٹ جسٹس اطہر من اللہ کی عدالت کی کازلسٹ آج پھر کینسل کردی گئی ہے۔

کاز لسٹ چیف جسٹس کی عدم موجودگی کے باعث تمام مقدمات کی سماعت منسوخ کردی گئی۔ چیف جسٹس کے ڈویژن بینچ میں بھی فکس کیسز کی کاز لسٹ کینسل ہے۔

چیف جسٹس کے ڈویژن بنچ میں آج کے لیے مقرر ایس ایس پی تشدد کیس میں عمران خان کی بریت  سے متعلق کیس پر سماعت بھی منسوخ کردی گئی ہے۔