گھر کے پائیں باغ میں بیٹھنے کے بعد امکان رہتا ہے کہ  چاروں جانب سے مچھروں کی یلغار شروع ہوجائے گی۔ اسی طرح باغات میں تقاریب کا اہتمام محال ہوجاتا ہے۔ اب ایسی ایل ای ڈی لائٹ بنائی گئی ہے جو گھر کو روشن کرتی ہے اور مچھروں کو بھی بھگاتی ہے۔

اسے ٹکی بائٹ فائٹر کا نام دیا گیا ہے جو اصل میں تو ایل ای ڈی روشنیاں ہیں لیکن بے آواز، بے بو ہوکر مچھر پھگانے والا انسان دوست کیمیکل خارج کرتی رہتی ہیں۔ اس طرح روشنیوں کی جھالر دھیرے دھیرے مچھر بھگآؤ کیمیائی اجزا خارج کرتی رہتی ہے۔

روشنیوں کی ایک لڑی کی لمبائی 36 فٹ ہے اور اس میں لگ بھگ 12 ایل ای ڈی بلب لگے ہیں جن میں مچھر دور کرنے والے کیمیکل کی چھوٹی ڈبیا لگی ہوتی ہیں۔ انہیں ختم ہونے پر بدلا جاسکتا ہے۔ اگر آپ ایک روشنی کی لڑی کو روزانہ ڈھائی گھنٹے استعمال کریں تویہ تین ماہ تک چلتی رہتی ہے۔ اس کے بعد بارہ روشنیوں کے ساتھ ڈبیوں میں دوبارہ کیمیکل بھرنا پڑتا ہے ۔

کمپنی کے مطابق یہ سارا نظام بہت دیرپا ہے اور برسوں کام کرتا رہتا ہے۔ تاہم بلب خراب ہونے پر انہیں دوبارہ بدلا بھی جاسکتا ہے۔ اگرآپ دس فٹ بلندی پر روشنیاں لگاتے ہیں تو 330مربع فٹ رقبے پر مچھر پر نہیں مارسکتا اور آپ کو ڈنک نہیں مارسکے گا۔ اس کے اندر دافع مچھر کیمیکل آتش گیر نہیں اور نہ ہی کوئی عجیب بو پیدا کرتا ہے۔

اگرآپ کسی جگہ مچھر کو بھگانا چاہتے ہیں تو صرف 15 منٹ پہلے لائٹ کھول دیں اور چاہیں تو صرف مچھربھگانے والا نظام آن کرسکتے ہیں۔