رحیم یار خان کی تحصیل صادق آباد کے گاؤں بستی کلواڑ میں دیوار گرنے سے 6 بچے جاں بحق جب کہ 2 زخمی ہوگئے۔

صوبہ پنجاب کے جنوبی ضلع رحیم یار خان کی تحصیل صادق آباد میں دیوار گرنے سے 6 بچے جاں بحق  جب کہ دو زخمی ہوگئے۔

مرنے والے بچوں کی عمریں  4  سے 7 سال کے درمیان ہیں جس میں 5 بچیاں اور ایک بچہ شامل ہے۔

علاقہ مکینوں کا کہنا ہے کہ دیوار گرنے سے جاں بحق ہونے والے بچے دیوار کے پاس کھیل رہے تھے۔

انہوں نے کہا کہ بارش کی وجہ سے دیوار خستہ حال ہوگئی تھی  اور اچانک بچوں کے اوپر آکر گر گئی۔

علاقہ مکینوں نے کہا کہ واقعے کے بعد اہل علاقہ موقع پر پہنچے اور امدادی کارروائیاں شروع کرتے ہوئے زخمی ہونے والے بچوں کو انڈس اسپتال منتقل کردیا ہے جہاں انہیں طبی امداد فراہم کی جارہی ہے۔