ترجمان حکومت پنجاب حسان خاور نے کہا ہے کہ پی پی سندھ کی عوام اور سیاست پر رحم کھائے۔

اپنے ایک بیان میں معاون خصوصی وزیرِ اعلیٰ پنجاب برائے اطلاعات و ترجمان حکومت پنجاب حسان خاور نے کہا کہ پیپلزپارٹی کا کسان مارچ نو سو چوہے کھا کر بلی حج کو چلی کے مترادف ہے۔

انہوں نے کہا کہ کسانوں میں خوشحالی لانے پر بلاول کو وزیراعظم عمران خان اور وزیراعلیٰ عثمان بزدار کا مشکور ہونا چاہیے۔

ترجمان حکومت پنجاب کا کہنا تھا کہ پی پی کا کسان مارچ نہیں ڈرامہ بازی اور الیکشن کمپین ہے، پی پی جتنے جتن کرلے قوم اس کرپٹ ٹولے کو مسترد کرچکی ہے۔

حسان خاور نے کہا کہ پی پی سندھ کی عوام اور سیاست پر رحم کھائے، پورا سندھ پیپلزپارٹی کیخلاف سراپا احتجاج بنا ہوا ہے۔

معاون خصوصی وزیرِ اعلیٰ پنجاب برائے اطلاعات و ترجمان حکومت پنجاب حسان خاور نے مزید کہا کہ بلاول سندھ کی عوام کی آواز دبانے کیلئے کسان مارچ کھیل رہے ہیں، پی پی کو اگلے الیکشن میں سندھ سے بھی شکست نظر آرہی ہے اس لیے اس طرح کے حربوں پر اتر آئی ہے۔