ووٹ کا حق دینے کے بعد تحریک انصاف نے سمندر پار پاکستانیوں کے ملکی سیاست میں بھرپور خیرمقدم کا فیصلہ کیا ہے۔

ذرائع کے مطابق اسلام آباد میں سمندر پار پاکستانیوں کے کنونشن کے انعقاد کی منظوری دیدی گئی۔

وزیراعظم  پاکستان و چیئرمین تحریک انصاف عمران خان خصوصی خطاب کریں گے۔

تحریک انصاف کے سیکرٹری اوورسیز انٹرنیشنل چیپٹرز ڈاکٹر عبداللہ ریاڑ کی اس حوالے سے مرکزی سیکرٹری جنرل اسد عمر سے ملاقات ہوئی۔

سمندر پار پاکستانیوں کے سہ روزہ اجتماع کے انعقاد کے حوالے سے اہم امور پر بریفنگ بھی دی گئی۔

سمندر پار پاکستانیوں کا تین روزہ اجتماع 13 تا 16 مارچ اسلام آباد میں منعقد ہوگا۔

اس اجتماع میں دنیا بھر میں قائم پاکستان تحریک انصاف کی شاخوں کے منتخب ذمہ داران اور کارکنان شرکت کریں گے۔

یورپ، امریکہ اور وسط ایشیاء سمیت دنیا کے دیگر حصوں سے مندوبین مدعو کئے جائیں گے۔

ملکی و غیر ملکی میڈیا کو بھی سمندر پار پاکستانیوں کے اس تاریخی اجتماع میں شرکت کی دعوت دے جائے گی۔

سمندر پار پاکستانی ہمارا بیش قیمت اثاثہ ہیں، اسد عمر

مرکزی سیکرٹری جنرل تحریک انصاف و وزیر منصوبہ بندی اسد عمر کا کہنا ہےکہ سمندر پار پاکستانی ہمارا بیش قیمت اثاثہ ہیں، سمندر پار پاکستانی روز اوّل سے عمران خان کے شانہ بشانہ ہیں۔

اسد عمر نے کہاکہ دیارغیر میں وطن عزیز کا نام روشن کرنے کے ساتھ ملکی تعمیر و ترقی میں سمندرپارپاکستانیوں کا کردار بے مثال ہے،تحریک انصاف ملکی سیاست میں سمندر پار پاکستانیوں کے کردار کو نہایت تحسین کی نگاہ سے دیکھتی ہے۔

وفاقی وزیر نے کہاکہ سمندر پار پاکستانیوں کا یہ اجتماع ملکی سیاسی تاریخ کا اہم سنگ میل ثابت ہوگا، دنیا بھر سے اپنے بھائیوں کو مدعو کریں گے اور وزیراعظم و چیئرمین تحریک انصاف آئندہ کا لائحہ عمل دیں گے۔