چیف جسٹس آف پاکستان نے اٹارنی جنرل کو نئے ڈپٹی اٹارنی کا بندوبست کرنے کا حکم دے دیا۔ 

تفصیلات کے مطابق سپریم کورٹ میں سروس میٹر سے متعلق کیس کی سماعت ہوئی۔ ڈپٹی اٹارنی جنرل عدالت میں پیش ہوئے۔

کیس کی سماعت کے دوران چیف جسٹس گلزار احمد نے کیس کی تیاری کرکے نہ آنے پر ڈپٹی اٹارنی جنرل جنرل نایاب گردیزی پراظہارِ برہمی کرتے ہوئے مکالمے میں کہا کہ آپ کس بات کے ڈپٹی اٹارنی جنرل ہیں؟

ڈپٹی اٹارنی جنرل نایاب گردیزی نے عدالت سے کہا کہ اپیل کنندہ کی جانب سے التوا کی درخواست کی وجہ سے کیس کی تیاری نہیں جس پر چیف جسٹس آف پاکستان نے کہا کہ التواء کی درخواست سے آپ کو کیا فرق پڑتا ہے۔

ریماکرکس میں جسٹس گلزار احمد نے کہا کہ کیا اس طرح بچگانہ انداز سے آپ کام کرتے ہیں؟ کیا ہم التواء کے لیے یہاں بیٹھے ہیں۔

سپریم کورٹ نے کہا کہ ڈپٹی اٹارنی جنرل عدالت کی معاونت کے اہل نہیں ہیں۔  ڈپٹی اٹارنی جنرل بغیر تیاری کے عدالت آئے

چیف جسٹس گلزار احمد نے اٹارنی جنرل کو حکم دیا کہ عدالتی معاونت کیلئے نئے ڈپٹی اٹارنی جنرل کا بندوبست کریں۔