وزیراعلیٰ پنجاب سردارعثمان بزدار نے پاکستان سپر لیگ7 کے آغاز پر کھلاڑیوں کو مبارکباد دی ہے۔

عثمان بزدارنے پاکستان سپر لیگ 7 میں شریک تمام ٹیموں کیلئے نیک خواہشات کا اظہار کرتے ہوئے کہا ہے کہ پاکستان کرکٹ بورڈ اورملکی و غیر ملکی کھلاڑیوں کو مبارکباد دیتا ہوں۔

انہوں نے کہا ہے کہ پاکستانی عوام میچ دیکھنے کیلئے پرجوش ہیں ، امید ہے کہ شائقین کو کرکٹ کے شاندار میچ دیکھنے کو ملیں گے ، میچز سے شائقین کرکٹ کو بہترین تفریح کا موقع ملے گا اور نیا ٹیلنٹ سامنے آئے گا۔

عثمان بزدار نے کہا ہے کہ پاکستان سپرلیگ7 کے انعقاد سے دنیا کو یہ پیغام جا رہا ہے کہ پاکستان ایک پر امن ملک ہے ، پاکستان کے عوام کھیلوں بالخصوص کرکٹ سے محبت کرتے ہیں۔

وزیراعلیٰ پنجاب نے کہا ہے کہ لاہور میں ہونے والے میچز کیلئے بہترین انتظامات یقینی بنائیں گے۔

واضح رہے کہ گزشتہ روز وزیر اعظم عمران خان کا پاکستان سپر لیگ (پی ایس ایل) کے حوالے سے اہم پیغام سامنے آیا تھا۔

پاکستان تحریک انصاف (پی ٹی آئی) کے آفیشل اکاؤنٹ سے پوسٹ کی گئی ویڈیو میں دیکھا جاسکتا ہے کہ چیئر مین پاکستان کرکٹ بورڈ(پی سی بی) رمیز راجہ وزیر اعظم کے پاس جاتے ہیں۔

اس کے بعد وزیر اعظم چیئر پی سی بی کے ہمراہ کہتے ہیں کہ میں پی ایس ایل کے ساتویں ایڈیشن کو اوپن کر رہا ہوں اور مجھے امید ہے کہ ہر ٹیم آخری گیند تک لڑے گی۔

پی ایس ایل کے ساتویں ایڈیشن کا آغاز 27 جنوری کو کراچی  میں دفاعی چیمپئن ملتان سلطانز اور کراچی کنگز کے درمیان میچ سے ہوگا۔

27 فروری تک جاری رہنے والے ایونٹ میں 34 میچز کھیلے جائیں گے۔