ناظم جوکھیو قتل کیس میں عدالت نےپراسیکیوٹر کو اسکروٹنی مکمل کرنے کے لیے تین روز کا وقت دے دیا۔

تفصیلات کے مطابق جوڈیشل مجسٹریٹ ملیرکراچی کی عدالت میں ناظم جوکھیو قتل کیس کی سماعت ہوئی۔

تفتیشی افسر نے عدالت کو بتایا کہ کیس کی تحقیقات مکمل کرلی گئی ہیں۔ چالان پراسیکیوشن آفس میں اسکروٹنی کے لئے جمع کروادیا گیا ہے۔

مدعی وکیل نے کہا کہ مقدمہ کو چارماہ ہوچکے ہیں تاخیری حربے استعمال کیے جارہے ہیں۔

پراسیکیوٹر نے کہا کہ پراسیکیوشن میں پیش کردہ چالان میں سقم پایا گیا ہے۔ قانونی تقاضے پورے کرنے کے لیے اسکروٹنی کے لیے وقت درکار ہے۔

پراسیکیوٹر نے عدالت کو بتایا کہ چالان میں نامزد تمام ملزمان کا کردار واضح نہیں ہے۔ چالان میں سقم کو دور کرنے کے لئے وقت دیا جائے۔

عدالت نے اسکروٹنی نوٹ کے ہمراہ آئندہ سماعت پرچالان پیش کرنے کا حکم دیتے ہوئے اسکروٹنی مکمل کرنے کے لیے تین روز کا وقت دے دیا

جیل حکام کی جانب سے ایم پی اے جام اویس سمیت 6 ملزمان کو پیش کیا گیا تھا۔

عدالت کے باہر ناظم جوکھیو قتل کیس کے سلسلے میں مقتول ناظم جوکھیو کی بیوہ سے ہمدردی میں وکلا اورسول سوسائٹی کی جانب سے احتجاجی مظاہرہ کیا گیا۔

احتجاجی مظاہرے نے ناظم جوکھیو کے قاتلوں کو سزا دو اورقاتل قاتل جام اویس کے نعرے لگائے۔