احتساب عدالت نے حمزہ شہباز کے وکلا کو بریت کی درخواست پر بحث کے لیے 20 جنوری کو طلب کرلیا۔

تفصیلات کے مطابق احتساب عدالت لاہورمیں شہباز شریف اور حمزہ شہباز کے خلاف رمضان شوگر مل ریفرنس کی سماعت ہوئی جس میں شہبازشریف کی جانب سے آج کی حاضری معافی کی درخواست منظورکی گئی۔

حمزہ شہباز کے وکیل نے عدالت سے بریت کی درخواست پر دلائل کے لیے مہلت مانگ لی۔

احتساب عدالت نے آئندہ سماعت پرحمزہ شہباز کی بریت کی درخواست پرفریقین کو دلائل دینے کا حکم دے دیا۔

احتساب عدالت نے حمزہ شہباز کی حاضری لگانے کے بعد ریفرنس کی سماعت ملتوی کردی۔

حمزہ شہباز کے وکلاء نے بریت کی درخواست پردلائل آج ہی دینے کی استدعا کی تھی جس پر احتساب عدالت نے حمزہ شہباز کے وکلاء کو بریت کی درخواست پر بحث کے لیے 20 جنوری کو طلب کرلیا۔

دوسری جانب احتساب عدالت میں شہباز شریف سمیت دیگرملزمان کے خلاف آشیانہ ریفرنس کی بھی سماعت ہوئی۔

وکیل شہبازشریف نے عدالت سے استدعا کی کہ شہبازشریف قومی اسمبلی کے اجلاس میں شرکت کے لیے اسلام آباد میں مصروف ہیں جس پرعدالت نے شہبازشریف کی آج کی حاضری معافی کی درخواست منظورکرلی۔

احتساب عدالت نے وکلا کوشہبازشریف کے شریک ملزم بلال قدوائی کی بریت کی درخواست پر دلائل دینے کی ہدایت کرتے ہوئےآشیانہ ہاؤسنگ ریفرنس کی سماعت 20 جنوری تک ملتوی کردی۔