جاپان میں کورونا وائرس کے نئے کیسز کی تعداد میں دن بدن اضافہ ہوتا جارہا ہے اور یومیہ کیسز کی تعداد میں ریکارڈ اضافہ ہوا ہے۔

جاپانی میڈیا کے مطابق منگل کو جاپان میں کورونا وائرس سے متاثرہ مریضوں کی کل تعداد 32 ہزار سے زائد تھی جو کسی بھی دن کے مقابلے میں سب سے زیادہ تعداد ہے۔

جاپان کے دارالحکومت ٹوکیو کی بلدیہ عظمیٰ کے ترجمان کا کہنا تھا کہ منگل کے روز ٹوکیو شہر میں 5 ہزار 185 نئے کورونا کیسز درج ہوئے ہیں۔ اور یہ تعداد ایک ہفتہ قبل کے مقابلے میں پانچ گنا سے بھی زیادہ ہے۔

جاپان کے اوساکا شہر کی انتظامیہ نے بھی کہا ہے کہ مغربی جاپان میں کورونا سے متاثرین کی تعداد یومیہ ریکارڈ سطح پر پہنچ گئی ہے اور کل 5 ہزار 396 نئے کیسز سامنے آئے ہیں۔

وسطی جاپان میں بھی کورونا کے وار تیزی سے بڑھتے جا رہے ہیں اور مجموعی طور 2 ہزار 145 نئے کورونا متاثرین کی تصدیق ہوئی ہے۔

جاپان کے شہر اوکیناوا کی مقامی انتظامیہ نے بھی شہر میں کورونا وائرس کے 1 ہزار 443 نئے کیسز کی تصدیق کی ہے۔

واضح رہے کہ گزشتہ روز جاپان کے مختلف شہروں نے اپنے اپنے علاقوں میں نیم ہنگامی حالت کے نفاذ کے لئے جاپان کی مرکزی حکومت کو درخواست کی ہے، تاکہ کورونا کے خلاف اقدامات کئے جائیں۔