پاکستان پیپلزپارٹی کی رہنما شازیہ مری نے کہا ہے کہ تبدیلی نہیں تباہی آچکی عمران خان اور ان کے ٹولے نے معیشت تباہ کردی۔

کراچی میں میڈیا سے گفتگو کرتے ہوئے پیپلز پارٹی کی رہنما شازیہ مری نے کہا کہ اس وقت عوام  کا سب سے بڑا مسئلہ مہنگائی ہے، اس وقت پاکستان ایشیا میں سب سے زیادہ مہنگاملک  ہے۔

شازیہ مری نے کہا کہ پاکستان میں مہنگائی 11 فیصد سے زائد  ہے، ہر پاکستانی پر تقریباً2لاکھ روپے قرض بڑھ چکا ہے، پاکستان مہنگائی کے لحاظ سے دنیا میں چوتھے نمبر پر ہے۔

انہوں نے کہا کہ تبدیلی نہیں تباہی آچکی ہے، عمران خان اوران کے ٹولے نے معیشت کو تباہ کیا اور حکومت تمام الزامات کوروناپرڈال دیتی ہے۔

پیپلز پارٹی کی رہنما کا کہنا تھا کہ خیبرپختون خوا میں عمران خان کی حکومت ہے  لیکن  وہاں بیروزگاری کی شرح 10 فیصد سے زائد ہوچکی ہے۔

شازیہ مری نے کہا کہ عمران خان بھارت کی مثالیں دیتے ہوئے نہیں تھکتے۔

ان کا کہنا تھا کہ بھارت میں 6 اعشاریہ 62 فیصد سے مہنگائی کم ہوکر 5 اعشاریہ 32 فیصد ہوگئی ہے۔

پیپلز پارٹی کی رہنما کا کہنا تھا کہ پاکستان میں 66 لاکھ سے زائد افراد بے روزگار ہیں لیکن عمران خان کہتے ہیں گھبرانا نہیں سب ٹھیک ہے مگر سب ٹھیک نہیں ہے۔