مری اور گلیات میں شدید برفباری کے باعث آئی جی پنجاب راؤ سردار علی خان نے پولیس کو برفباری میں پھنسے سیاحوں کی ہنگامی بنیادوں پر مدد کرنے کا حکم دیا ہے۔

وزیراعلیٰ پنجاب اور آئی جی پنجاب کے حکم پر آر پی او راولپنڈی، سی پی او راولپنڈی اور سی ٹی او راولپنڈی سمیت پولیس اور ٹریفک پولیس کی بڑی تعداد مری میں موجود ہیں۔

آئی جی پنجاب کا کہنا ہے کہ برف ہٹانے کے لیے پنجاب پولیس، پنجاب ہائی وے متعلقہ اداروں کے ساتھ مل کر ہنگامی بنیادوں پر کام کریں۔

انہوں نے کہا کہ خواتین، بچوں اور بزرگوں کو فوری طور پر محفوظ مقام پر پہنچایا جائے، کمبل، گرم کپڑے اور خوراک کی ترسیل یقینی بنائی جائے۔

مزید پڑھیے: مری میں سیاحوں کی سہولت کیلئے ضروری ہدایات

راؤ سردار نے کہا کہ آر پی او راولپنڈی سارے آپریشن کی خود نگرانی کریں، شہریوں کو بحفاظت محفوظ مقام پر پہچانا اولین ترجیح ہے، ضلعی انتظامیہ، ریسکیو اور محکمہ صحت کے ساتھ کوآرڈینیشن کرتے ہوئے ہر ممکن اقدام یقینی بنائیں۔

آئی جی پنجاب نے پنجاب ہائی پولیس کو ہیوی مشینری اور تمام وسائل ہنگامی بنیادوں پر مری پہنچانے کا حکم دیا ہے۔

انکا کہنا ہے کہ آر پی او راولپنڈی مری کے داخلی اور خارجی راستوں کی نگرانی سمیت برفباری ہٹانے کے لیے تمام متعلقہ اداروں سے کوآرڈینیشن کریں۔

مزید پڑھیے: مری میں برفباری سے پھنسی گاڑیوں میں 19 اموات ہوئیں، شیخ رشید

آئی جی پنجاب نے کہا کہ مسلسل برفباری اور گاڑیوں میں ہیٹر چلنے کی وجہ سے سانس اور پھیپھڑوں کی بیماری میں مبتلا شہریوں کو  فوری فرسٹ ایڈ دی جائے۔

راؤ سردار علی خان نے مزید کہا کہ شہریوں سے اپیل ہے کہ ضلعی انتظامیہ اور پولیس سے تعاون کریں، سیاحوں کو مسلسل مدد اور راہنمائی فراہم کی جائے۔