سعید غنی نے کہا ہے کہ پیپلز پارٹی اس ملک کی واحد سیاسی جماعت ہے۔

وزیر اطلاعات و محنت سندھ و صدر پیپلز پارٹی کراچی ڈویژن سعید غنی نے کیمپ آفس میں پیپلز پارٹی کراچی ڈویژن کے اجلاس سے خطاب کرتے ہوئے کہا کہ چیئرمین بلاول بھٹو زرداری کی ہدایات پر ان مظاہرے کے سلسلے کو مزید بڑھایا جارہا ہے اور اب کراچی ڈویژن تمام اضلاع میں روزانہ کی بنیاد پر ریلیاں اور دھرنے دے گے۔

اجلاس میں 27 فروری سے کراچی سے شروع ہونے والے لانگ مارچ کے حوالے سے کی جانے والی تیاریوں پر بھی تفصیلی غور و خوض کیا گیا اور اس سلسلے میں 5 مختلف کمیٹیاں تشکیل دی گئی ہیں، جو لانگ مارچ کی تیاریوں اور کراچی سے اسلام آباد تک کے تمام امور کی نگرانی کریں گی۔

اجلاس میں فیصلہ کیا گیا کہ لانگ مارچ کے سلسلے میں کراچی بھر میں تشہری مہم کا بھی آغاز جلد ہی کیا جائے گا اور اس سلسلے میں ڈسٹرکٹ، سٹی، یوسی اور وارڈز کی سطح پر عوام میں آگاہی کے لئے تمام وسائل کو بروئے کار لایا جائے گا۔

سعید غنی نے اجلاس کی صدارت کرتے ہوئے کہا کہ پیپلز پارٹی اس ملک کی واحد سیاسی جماعت ہے جس نے موجودہ نااہل اور نالائق حکومت اور ان کی ناقص معاشی پالیسی کے باعث مہنگائی، بیروزگاری، گیس کے بحران پر ملک گیر احتجاجی مظاہرے کئے ہیں۔

انہوں نے کہا کہ موجودہ نالائق اور نااہل حکمرانوں کی نالائقیوں نے اس ملک کے 22 کروڑ عوام کی زندگی اجیرن بنا دی ہے، مہنگائی نے اس ملک کے عوام کی کمر توڑ کر رکھ دی ہے اور اب صورتحال یہ ہے کہ لوگوں کو دو وقت کا کھانا بھی نہ ممکن ہوچکا ہے۔

سعید غنی نے کہا کہ صوبہ سندھ گیس پیدا کرنے والا بڑا صوبہ ہے اور حالت یہ ہے کہ یہاں کی صنعتوں کو تو کجا رہائشیوں کو بھی کھانا پکانے کے لئے گیس میسر نہیں ہے۔

ان کا کہنا تھا کہ پیپلز پارٹی کراچی ڈویژن موجودہ نااہل اور نالائق سلیکیٹیڈ حکومت کی نااہلی کے باعث ملک میں بڑھتی مہنگائی، بیروزگاری اور گیس کے بحران کے خلاف ضلعی سطح پر احتجاجی مظاہرے، ریلیاں اور دھرنے دے گی۔

وزیر اطلاعات سندھ سعید غنی کا مزید کہنا تھا کہ کہ چیئرمین پیپلز پارٹی بلاول بھٹو زرداری کے 27 فروری کو کراچی سے شروع ہونے والے لانگ مارچ میں کراچی سے ہزاروں کی تعداد میں کارکنان اور عوام اس لانگ مارچ میں شریک ہوں گے اور اس حوالے سے تیاریوں کا آغاز کردیا گیا ہے۔

اجلاس میں پیپلز پارٹی کراچی ڈویژن کے جنرل سیکرٹری جاوید ناگوری، نائب صدر مرزا مقبول، سردار خان، امان اللہ محسود، سیکرٹری اطلاعات کراچی شہلا رضا، ذوالفقار قائمخانی، ڈپٹی سیکٹری اطلاعات آصف خان، شکیل چوہدری، فنانس سیکرٹری خالد لطیف، عابد ستی، نوید بھٹی، شاہینہ شیر علی، ڈسٹرکٹ سینٹرل کے صدر مسرور احسن، ساجد جوکھیو، تمام اضلاع کے صدور، جنرل سیکرٹری، انفارمیشن سیکرٹریز، پیپلز یوتھ، پیپلز اسٹوڈنٹس فیڈریشن، پیپلز لیبر بیورو، پیپلز اقلیتی ونگ سمیت تمام دیگر تنظیموں کے عہدیداروں نے شرکت کی۔