وزیراعظم عمران خان کے معاون خصوصی موسمیاتی تبدیلی ملک امین اسلم کورونا کا شکار ہوگئے ہیں۔

تفصیلات کے مطابق کورونا کا شکار ہونے کے بعد ملک امین نے خود کو اپنے گھر میں قرنطینہ کرلیا ہے۔

 معاون خصوصی نے کورونا مثبت آنے پر اپنی تمام ترمصروفیات اورپروگرامات بھی منسوخ کردیے ہیں۔

یاد رہے کہ کورونا کی پانچویں لہر کے دوران کراچی میں مثبت کیسز کی شرح میں شدید اضافہ ہو رہا ہے۔

محکمہ صحت سندھ کے مطابق کراچی میں گزشتہ چوبیس گھنٹوں میں مثبت کیسز کی شرح 15 سے بڑھ کر 18.1 فیصد تک جا پہنچی ہے۔

سندھ میں گزشتہ چوبیس گھنٹوں میں 940 کیسز رپورٹ ہوئے ،جن میں سے 805 کیسز کا تعلق کراچی سے ہے۔

ماہرین صحت کا کہنا ہے کہ گزشتہ روز رپورٹ ہونے والے کیسز میں سے 80 فیصد اومیکرون ہیں ، شہری ویکسی نیشن کروائیں اور بوسٹرڈوز لگوائیں۔

کراچی، لاہور اور اسلام آباد کے بعد پشاور میں بھی کورونا کی جنوبی افریقی قسم اومیکرون کے کیسز بڑھنے لگے ہیں۔

  این سی او سی کے مطابق گزشتہ چوبیس گھنٹوں کے دوران ملک بھر میں کورونا کے مثبت کیسز کی شرح ساڑھے 3 فیصد کے قریب رہی جبکہ مزید 2 افراد کورونا سے انتقال کرگئے ہیں۔