بالی ووڈ فلم ’’ایڈونچر آف ٹارزن‘‘ سے شہرت حاصل کرنے والے معروف اداکار ہیمنت برجے اپنی اہلیہ کے ساتھ کار حادثے میں معمولی زخمی ہو گئے۔

بھارتی میڈیا رپورٹس کے مطابق اداکار ممبئی سے پونے جا رہے تھے اور رات 9 بجے کے قریب ٹول پلازہ کے قریب تھے جب یہ حادثہ پیش آیا۔

پولیس کے مطابق اداکار نے اپنی گاڑی کا کنٹرول کھو دیا اور ایک ڈیوائیڈر سے ٹکرا گئے۔

پولیس حکام کے مطابق 56 سالہ ہیمنت برجے اپنی اہلیہ آمنہ اور بیٹی ریشما کے ساتھ خاندان کے کچھ افراد سے ملنے کے بعد ممبئی سے پونے جا رہے تھے۔

حکام نے مزید بتایا کہ اداکار اور ان کی اہلیہ کو معمولی چوٹیں آئیں جب کہ ان کی بیٹی محفوظ رہی، انہیں فوری طور پر اسپتال لے جایا گیا جہاں انہیں طبی امداد فراہم کی گئی۔

ہیمنت نے سال 1985 فلم ‘ایڈونچرز آف ٹارزن’ سے اپنے کیریئر کا آغاز کیا جس میں انہوں نے کِمی کٹکر کے ساتھ ٹارزن کا مرکزی کردار ادا کیا۔

اس کے بعد وہ ‘آج کے انگارے’، ‘تہخانہ’، ‘ویرانا’، ‘کمانڈو’، ‘قبرستان’، ‘سو سال بعد’ اور ‘آگ’ جیسی کئی مشہور فلموں میں کام کر چکے ہیں۔