گورنر سندھ نے کہا ہے کہ پر امن مظاہروں کے ساتھ پر امن طریقہ سے ڈیل کرنا ہی مناسب ہوتا ہے۔

اپنے ایک بیان میں گورنر سندھ عمران اسماعیل نےکہا کہ آج ایم کیو ایم پاکستان کے ساتھ جو بربریت کا مظاہرہ کیا گیا ، وہ انتہائی افسوس ناک عمل ہے۔

  انہوں نے کہا کہ سندھ حکومت کو بڑے دل کا مظاہرہ کرنا چاہیے اور جو جماعتیں پر امن احتجاج کررہی ہیں ان کے ساتھ پر امن طریقے سے بات چیت کرکے معاملات کو حل کرنا چاہیے۔

 گورنر سندھ کا کہنا تھا کہ جس طرح پولیس تشدد کا مظاہرہ کیا گیا جس میں بالخصوص نہتی خواتین کو نشانہ بنایا گیا، انتہائی افسوس کا عمل ہے۔

 عمران اسماعیل نےکہا کہ یہ جو طاقت کا مظاہرہ ہے یہ اسٹیٹ کی طرف سے مناسب نہیں ہوتا، پر امن مظاہروں کے ساتھ پر امن طریقہ سے ڈیل کرنا ہی مناسب ہوتا ہے۔

 گورنر سندھ عمران اسماعیل کا مزید کہنا تھا کہ میں وزیر اعلیٰ سندھ سے درخواست کرتا ہوں کہ وہ تمام جماعتوں سے بیٹھ کر بات کریں۔

واضح رہے کہ متحدہ قومی موومنٹ پاکستان کی جانب سے آج سندھ کے متنازع بلدیاتی قانون کے خلاف احتجاج کیا اور ریلی نکالی جبکہ وزیراعلیٰ ہاؤس کے باہر مظاہرین کی جانب سے دھرنا بھی دیا گیا جس میں بڑی تعداد میں خواتین نے بھی شرکت کی۔

اس دوران مظاہرین نے وزیراعلیٰ ہاؤس جانے کی کوشش کی جس پر پولیس کی جانب سے مظاہرین کو منتشر کرنے کے لیے لاٹھی چارج اور شیلنگ کی گئی جبکہ ریلی میں شریک کارکنان نے سندھ حکومت کے خلاف شدید نعرے بازی کی۔

پولیس کی جانب سے لاٹھی چارج کرنے پر ایم کیو ایم پاکستان کے رکن صوبائی اسمبلی صداقت حسین زخمی ہوگئے اور سر پر ڈنڈا لگنے سے ان کا سر بھی پھٹ گیا۔

بعد ازاں پولیس نے ایم کیو ایم پاکستان کے کئی کارکنوں کو حراست میں لے لیا جس میں خواتین بھی شامل ہیں جبکہ رکن سندھ اسمبلی صداقت حسین کو بھی زخمی حالت میں گرفتار کرلیا گیا۔