دورہ پاکستان سے قبل کرکٹ آسٹریلیا نے ٹیسٹ سیریز کے حوالے سے اپنی خواہش کا اظہار کردیا ہے۔

تفصیلات کے مطابق کرکٹ آسٹریلیا نے دورہ پاکستان میں کرونا وائرس کے سبب تین میچوں پر مشتمل ٹیسٹ سیریز کو ایک وینیو پر کھیلنے کی خواہش ظاہر کی ہے جبکہ پاکستان کرکٹ بورڈ کے ساتھ بات چیت جاری ہے۔

رپورٹ میں بتایا گیا ہے کہ ٹیسٹ میچز ایک وینیو پر کھیلنے کی اہم وجہ سیکورٹی اور کھلاڑیوں کی صحت ہے۔

آسٹریلوی میڈیا کی رپورٹ کے بعد پی سی بی ترجمان کا کہنا ہے کہ ایک مقام پر تمام ٹیسٹ میچز کرانے کی کوئی تجویز زیر بحث نہیں آئی اور ایک مقام پر 19 دن میچز کروانا ممکن نہیں۔

دوسری جانب کرکٹ آسٹریلیا نے دورہ پاکستان کی تیاریوں کی تصدیق کرتے ہوئے دو بڑے کھلاڑیوں کو سری لنکا کے خلاف ٹی ٹوئنٹی  سیریز میں آرام دینے کا فیصلہ کیا ہے۔

پاکستان کے دورے کی وجہ سے ڈیوڈ وارنر اور مچل مارش سری لنکا کے خلاف ٹی ٹوئنٹی  سیریز میں شامل نہیں ہیں۔

واضح رہے کہ پاکستان اور آسٹریلیا کے درمیان پہلا ٹیسٹ 3 مارچ سے کراچی میں شروع ہونا ہے جبکہ دیگر دو ٹیسٹ میچز راولپنڈی اور لاہور میں شیڈول ہیں، اسی طرح 3 ون ڈے اورایک ٹی ٹوئنٹی  میچز لاہور میں کھیلے جائیں گے۔