مسلم لیگ ن کی ترجمان مریم اورنگزیب نے کہا ہے کہ عمران صاحب نے ملک کو دھیلے کی ترقی نہیں دی۔

مریم اورنگزیب نے انٹریشنل کرپشن کی رپورٹ پر رد عمل دیتے ہوئے کہا کہ عمران خان کو ٹرانسپرنسی انٹرنیشنل کی رپورٹ پر قوم سے خطاب کرنا چاہیے۔

انہوں نے کہا کہ عمران صاحب قوم کو بتائیں کہ آٹا، چینی، بجلی، گیس، دوائی کی چوری کی وجہ سے پاکستان آج کرپشن بڑھ چکی ہے آپ کی کرپشن، لوٹ مار کے نتیجے میں آٹا، چینی، بجلی، گیس، دوائی سمیت کوئی چیز عوام خریدنے کے قابل نہیں رہی۔

مریم اورنگزیب نے کہا کہ 2013 سے 2018 کے درمیان ریکارڈ ترقی ہوئی، ریکارڈ شفافیت آئی وزیراعظم نواز شریف کی قیادت میں ملک میں سی پیک آیا۔

انکا کہنا ہے کہ ایل این جی، پاور پلانٹس، موٹرویز، پبلک ٹرانسپورٹ کے درجنوں منصوبے لگے اور کھربوں روپے کے منصوبوں کے ساتھ ملک میں کرپشن میں کمی بھی آئی، عمران صاحب نے ملک کو دھیلے کی ترقی نہیں دی۔

مریم اورنگزیب نے مزید کہا کہ ایک نیا منصوبہ نہیں دیا الٹا لوٹ مار کے نئے ریکارڈ قائم کردیئے، کرپشن کے اس عذاب نے آج قوم سے کھانے پینے کی اشیاء بھی چھین لیں، قوم کو روٹی کا محتاج کر دیا۔

مزید پڑھیں: پاکستان میں کرپشن مزید بڑھ گئی، بین الاقوامی انڈیکس میں 140واں نمبر