شازیہ مری نے کہا ہے کہ سلیکٹڈ حکومت کو مری سانحہ نہیں بھولنے دیں گے۔

پارلیمنٹ ہاؤس کے باہر میڈیا سے گفتگو  کرتے ہوئے پاکستان پیپلزپارٹی پارلیمنٹرینز کی سیکریٹری اطلاعات شازیہ مری نے کہا کہ سانحہ مری پر بلاول بھٹو نے دکھی خاندانوں سے اظہار دکھ کیا، یہ بڑا سانحہ تھا جس کے لیے ہمارا مطالبہ تھا کہ صرف مری کے سانحہ پر بات ہو۔

انہوں نے کہا کہ اپوزیشن نے کل حقائق پر بات کی افسوس ہے کہ کل حکومتی وزیر کا بیان بلکل درست نہیں تھا، جس طرح وہ بات کر رہے تھے ان کا لہجہ صیح نہیں تھا۔ مجھے حیرت ہے کہ وہ وزیر ایسی بات کر کیسے رہا ہے جو ایک دن پہلے ٹویٹ کرکے جشن منا رہاتھا، اس وزیر کی زبان بندی ہونی چاہیے لیکن انہیں فلور دیا گیا۔

پاکستان پیپلزپارٹی پارلیمنٹرینز کی سیکریٹری اطلاعات کا کہنا تھا کہ مری میں انتظامیہ کی جانب سے ظلم کیا گیا ہے، حکومت مری سانحہ کے حوالے سے بے حسی کا مظاہرہ کر رہی ہے، لوگوں نے میسج کئے لیکن ان کی مدد نہیں ہوئی۔

ان کا کہنا تھا کہ یہی عمران خان چھوٹی چھوٹی باتوں پر استعفے مانگتا تھا اور جوڈیشل کمیشن کا مطالبہ کرتا تھا۔ پی پی پی حکومتی بنائی جانے والی کمیٹی کو مسترد کرتی ہے، ہمارا مطالبہ ہے کہ اس واقعہ کی جوڈیشل انکوائری کرائی جائے۔

شازیہ مری نے کہا کہ ہم اس حکومتی کمیٹی اور حکومت پر عدم اعتماد کا اظہار کرتے ہیں، حکومت کو بتانا چاہیے کہ کیوں انتظامیہ حرکت میں نہیں آئی اور کیوں این ڈی ایم اے کی ہنگامی رپورٹ طلب نہیں کی گئی۔

پاکستان پیپلزپارٹی پارلیمنٹرینز کی سیکریٹری اطلاعات شازیہ مری نے مزید کہا کہ اس سلیکٹڈ حکومت کو مری سانحہ نہیں بھولنے دیں گے یہ سب اس حکومت کی نااہلی کے سبب ہوا ہے جبکہ اس سانحہ کے ذمہ دار انتظامیہ،وفاقی و صوبائی حکومت اور جن کی بھی حدود تھی وہ سب ذمہ دار ہیں۔