مری میں پھر برف باری کا امکان ہے، محکمہ سیاحت پنجاب نے سیاحوں کو خبردار کردیا ہے۔

 پنجاب ڈیزاسٹر مینجمنٹ اتھارٹی نے آئندہ ہفتے برف باری اور بارشوں کی پیشگوئی کردی ہے۔

محکمہ موسمیات کے مطابق منگل کی شام کو مری میں برف باری توقع ہے جبکہ برف باری کا سلسلہ جمعرات تک برقرار رہے گا۔

راولپنڈی، اٹک، چکوال، جہلم سمیت شمالی پنجاب کے کئی شہروں میں بارشوں کا اعلان بھی کیا گیا ہے جبکہ صوبے بھر میں شدید دھند کا سلسلہ برقرار رہے گا۔

محکمہ سیاحت پنجاب نے شہریوں کو آئندہ ہفتے سیاحتی مقامات کی طرف جانے سے گریز کرنے کی ہدایت کی ہے۔

محکمہ سیاحت پنجاب کا کہنا ہے کہ موسمی شدت کے پیش نظر لوگوں کو احتیاط سے کام لینا ہو گا۔

واضح رہے کہ آئندہ ہفتے ملک کے مختلف حصوں میں پھر بارش کا امکان بتایا جارہا ہے۔

محکمہ موسمیات کے مطابق ملک کے مغربی اور بالائی علاقوں میں 18 تا 20 جنوری سے  ہلکی سے درمیانی بارشوں کا سلسلہ داخل ہوگا۔

محکمہ موسمیات کا کہنا ہے کہ ملک کے مختلف حصوں میں ہلکی سے درمیانی بارش اور پہاڑوں پر برفباری کا بھی امکان ہے۔

محکمہ موسمیات کے مطابق دیر، مالاکنڈ، ہزارہ، سوات، کوہستان، گلگت بلتستان اور کشمیر کے کچھ علاقوں میں منگل اور بدھ کو لینڈ سلائیڈنگ کا خدشہ ظاہر کیا گیا ہے۔

این ڈی ایم اے نے تمام متعلقہ محکموں کو  الرٹ رہنے کی ہدایت جاری کرتے ہوئے کہا ہے کہ صوبائی ڈیزاسٹر مینجمنٹ اتھارٹیز متعلقہ محکموں کے ساتھ رابطہ قائم کر کے حساس مقامات پر ضروری مشینری اور دیگر ایمرجنسی  ساز و سامان کی موجودگی یقینی بنا ئیں۔

 این ڈی ایم اے کے مطابق سیاح اور مسافر حضرات کو موسم کے احوال سے  مسلسل آگاہ رکھا جائے۔