تنخواہ نہ ملنے پر شہر کے سب سے بڑے ماس ویکسینیشن مرکزایکسپو سینٹر میں ہڑتال آج چھٹے روز بھی جاری ہے۔

تفصیلات کے مطابق عملے کی ہڑتال کی وجہ سے ویکسینیشن کا عمل رک گیا ہے جس کے باعث ویکسین کے لیے آنے والے شہری مایوس لوٹنے پر مجبور ہیں۔

ملازمین کا کہنا ہے کہ 9ماہ میں ہم آٹھویں بار احتجاج کر رہے ہیں، ہمیں تنخواہوں کے چیک اور کانٹریکٹ لیٹر فراہم کئے جائیں۔

واضح رہے کہ 9 ماہ سے تنخواہوں کی عدم ادائیگی کی وجہ سے ڈیٹا آپریٹر، ویکسی نیٹرز سمیت آئی ٹی ڈپارٹمنٹ کے ڈھائی سو ملازمین کے عملے نے ہڑتال  کی ہوئی ہے۔

کورونا نے مزید 27 افراد کی جان لے لی

ملک بھر میں عالمی وبا کورونا وائرس سے مزید 27 افراد جاں بحق ہو گئے۔

نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گزشتہ 24 گھنٹوں کے دوران مثبت کیسز کی شرح 11.31 فیصد ریکارڈ کی گئی ہے۔

این سی او سی کے مطابق کورونا وائرس سے 27 افراد جاں بحق ہوگئے، جس کے بعد اموات کی تعداد 29 ہزار 192 ہوگئی۔

پاکستان میں کورونا کے تصدیق شدہ کیسز کی تعداد 14 لاکھ 10 ہزار 33 ہوگئی۔

نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گزشتہ 24 گھنٹوں کے دوران 7963 نئے کیسز رپورٹ ہوئے۔

پنجاب میں  4لاکھ 74 ہزار 208، سندھ میں 5 لاکھ 38 ہزار 196، خیبرپختونخوا میں  ایک لاکھ  90ہزار 578، بلوچستان میں 34,277، گلگت بلتستان میں 10 ہزار 604، اسلام آباد میں ایک لاکھ 25 ہزار جبکہ آزاد کشمیر میں 36 ہزار 967 کیسز رپورٹ ہوئے۔