ٹی ٹوئنٹی اور ون ڈے کے بعد بھارتی مایہ ناز بلے باز ویرات کوہلی ٹیسٹ کپتانی سے بھی ہاتھ دھو بیٹھے۔

تفصیلات کے مطابق ناقص فارم اور بھارتی کرکٹ اتھارٹی کے دباؤ سے نبردآزما بھارتی بلے باز نے ٹیسٹ کپتانی چھوڑنے کا باضابطہ اعلان سماجی رابطے کی ویب سائٹ پر کیا ہے۔

طویل انسٹاگرام پوسٹ پر انھوں نے کہا کہ ہر چیز کا ایک اختتام ہے۔ 7برس کی طویل جدوجہد اور محنت کہ جس کا مقصد ٹیم کو ایک نئی جہت اور سمت کیساتھ کامیابیوں سے ہمکنار کروانا مقصود رہا۔

میں نے یہ ذمےداری پوری محنت اور دیانت داری کیساتھ نبھائی اور اپنا 120پرسنٹ کردار ادا کیا ہے۔

انھوں نے مزید کہا کہ میں بی سی سی آئی کا شکر گزار ہوں کہ اس نے مجھے ایک طویل عرصے تک یہ ذمے داری نبھانے کا موقع دیا اور تمام ساتھی کھلاڑیوں کا کہ جنھوں نے میرے بھارتی کرکٹ ٹیم کے بابت وژن میں میرا ساتھ دیا۔

اپنی پوسٹ کے اختتام پر انھوں نے کہا کہ میں ایم ایس دھونی کا مشکور ہوں کہ انھوں نے مجھ پر بطور کپتان اعتبار کیا۔

یاد رہے کہ کوہلی اپنی ناقص فارم کے باعث کرکٹ حلقوں کی جانب سے کی جانے والی تنقید کا شکار تھے۔ ویرات کوہلی نے 99 ٹیسٹ میچوں میں 50 کی اوسط سے 7962 رنز اسکور کیے۔ ٹیسٹ میچز میں ان کا ہائی اسکور ناقابل شکست 254 رہا۔

علاوہ ازیں کہا جارہا ہے کہ بطور کھلاڑی ان کی اسکواڈ میں شمولیت پر بھی سنجیدہ کرکٹ حلقوں میں سوال اٹھایا جارہا ہے۔