بھارتی ٹینس اسٹار اور قومی ٹیم کے آل راؤنڈر شعیب ملک کی اہلیہ ثانیہ مرزا آسٹریلین اوپن ٹینس مکسڈ ڈبلز کے کوارٹر فائنل میں پہنچ گئی ہیں۔

بھارت کی ٹینس اسٹار ثانیہ مرزا اور ان کے امریکی جوڑی دار راجیو رام آسٹریلین اوپن ٹینس ٹورنامنٹ کے مکسڈ  ڈبلز مقابلوں کے کوارٹر فائنل راؤنڈ میں پہنچ گئ ہیں۔

انہوں نے میگا ایونٹ کے مکسڈ ڈبلز مقابلوں کے دوسرے راؤنڈ میں میزبان ٹینس کھلاڑی ایلن پیریز اور ان کے ہالینڈ کے جوڑی دار مٹ وی مڈل کوپ کو شکست دی ہے۔

رواں سال کا پہلا گرینڈ سلم آسٹریلین اوپن ٹینس ٹورنامنٹ آسٹریلیا کے مشہور شہر میلبورن میں جاری ہے جس میں شائقین ٹینس کو دلچسپ اور کانٹے دار مقابلے دیکھنے کو مل رہے ہیں۔

میگا ایونٹ میں مکسڈ  ڈبلز کے دوسرے راؤنڈ میں ثانیہ مرزا اور راجیو رام نے عمدہ کھیل پیش کرتے ہوئے میزبان  ٹینس کھلاڑی ایلن پیریز اور ان کے ہالینڈ کے جوڑی دار مٹ وی مڈل کوپ  کو اسٹریٹ سیٹس میں ٹائی بریک پر 6-7،6-8 اور 4-6  سے ہرا کر کوارٹر فائنل کے لئے کوالیفائی کیا ہے۔

واضح رہے کہ بھارتی ٹینس اسٹار ثانیہ مرزا نے ٹینس سے ریٹائرمنٹ لینے کا اعلان کیا ہے جبکہ انہوں نے یہ فیصلہ آسٹریلین اوپن خواتین کے ڈبل ایونٹس کے پہلے راؤنڈ میں شکست کے بعد کیا تھا۔

ثانیہ مرزا کا ریٹائرمنٹ کا اعلان کرتے ہوئے کہنا تھا کہ ’یہ فیصلہ آسان نہیں تھا لیکن اس کی کچھ وجوہات ہیں، میرے لیے سب سے اہم میرا بیٹا ہے اور میرا بہت زیادہ سفر کرنا اس کے لیے اچھا نہیں‘۔

انہوں نے مزید کہا تھا کہ میری فٹنس بھی کافی کم ہورہی ہے اور مجھے لگتا ہے کہ اس کی ریکوری میں لمبا عرصہ لگے گا۔