اسپیکر پنجاب اسمبلی چوہدری پرویزالہٰی نے کہا ہے کہ پاکستان کی تعلیم و ترقی میں مسیحی برادری کا بڑا اہم کردار ہے۔

چوہدری پرویزالہٰی سے آرچ بشپ لاہور سبسٹین فرانسس شاء کی وفد کے ہمراہ ملاقات ہوئی جہاں کرسمس اور نئے سال کا کیک بھی کاٹا گیا۔

وفد میں فادر مشتاق پیارا، سسٹر ٹریسا یعقوب، سسٹر کلیئر یوسف اور عاشر جاوید شامل تھے۔

اسپیکر پنجاب اسمبلی نے ملاقات میں گفتگو کرتے ہوئے کہا کہ پاکستان میں تمام مذاہب کو مکمل آزادی حاصل ہے۔

انہوں نے کہا کہ تمام اقلیتوں کی خوشیاں سانجھی ہیں، مسیحی برادری کی خوشیوں میں ہم برابر کے شریک ہیں۔

چوہدری پرویزالہٰی نے مزید کہا کہ پاکستان کی تعلیم و ترقی میں مسیحی برادری کا بڑا اہم کردار ہے، انکی وطن سے محبت ناقابل فراموش ہے۔

ملاقات میں آرچ بشپ لاہور سبسٹین فرانسس شاء نے چوہدری پرویزالہٰی کا شکریہ ادا کیا۔

دوسری جانب آرچ بشپ لاہور سبسٹین فرانسس شاء نے کہا کہ بطور وزیراعلیٰ پنجاب چوہدری پرویزالہٰی نے پہلی بار اقلیتوں کیلئے علیحدہ وزارت قائم کی ہے۔

انہوں نے کہا کہ چوہدری پرویزالہٰی کے دور میں تمام مسیحی اداروں اور املاک کو واپس کیا گیا۔

سبسٹین فرانسس شاء نے مزید کہا کہ چرچوں کی بحالی و مرمت کیلئے پنجاب کے بجٹ میں فنڈز مختص کیے اور کچی آبادیوں کو مالکانہ حقوق دیئے جس پر تمام اقلیتی برادری آپ کی احسان مند ہے۔