بھارتی ائیر فورس کا ایک تربیتی طیارہ تربیتی پرواز کے دوران بہار میں ہچکولے کھاتا ہوا زمین بوس ہو گیا۔

جہاز میں سوار دونوں پائلٹس نے کود کر اپنی جان بچائی۔

بھارتی میڈیا کی رپورٹ کے مطابق انڈین آرمی آفیسرز کی ٹریننگ اکیڈمی کے ایک طیارے نے دو پائلٹس کو لے کر تربیتی پرواز کے لئے ائیرپورٹ سے اڑان بھری مگر کچھ دیر بعد ہی گر کر تباہ ہو گیا۔

عینی شاہدین کے مطابق طیارے کو ہچکولے کھاتے ہوئے تیزی سے زمین کی طرف آتے ہوئے دیکھا گیا، طیارہ زمین پر آنے سے گاؤں کے لوگ خوف ذدہ ہو گئے۔

تربیتی طیارہ دیکھتے ہی دیکھتے کھیتوں میں جا گرا اور اس میں آگ بھڑک اُٹھی۔

بھارتی ائیر فورس کے ترجمان کا کہنا ہے کہ طیارہ تربیتی پرواز پر تھا اور اس میں دو پائلٹس سوار تھے، طیارے میں فنی خرابی کے باعث دونوں پائلٹس نے ہنگامی لینڈنگ کی کوشش کی مگر ناکام ہو گئے۔

دونوں پائلٹس نے طیارے سے کود کو اپنی جان بچائی ، دونوں پائلٹس کو معمولی چوٹیں آئیں۔

واضح رہے کہ بھارتی طیاروں کے گرنے کا یہ پہلا واقعہ نہیں ہے ، بھارتی فضائیہ کے  استعمال میں ناقص اور پرانے طیارے موجود ہیں جو آئے دن گر کر بھارتی فوج کے لئے سبکی کا باعث بنتے ہیں۔

بھارتی فضائیہ کے افسران نے اپنی حکومت سے متعدد مرتبہ درخواستیں کی ہیں کہ انہیں تربیتی پروازوں کے لئے نئے طیارے دیئے جائیں۔