امریکی صدر جو بائیڈن نے یوکرائن کے صدر ولودیمیر زیلنسکی سے ٹیلی فون پر رابطہ کیا ہے۔

وائٹ ہاؤس سے جاری بیان کے مطابق صدر بائیڈن نے ایک بار پھر اس عزم کا اظہار کیا ہے کہ روس کے یوکرائن پر حملہ کرنے کی صورت میں وہ اتحادیوں کے ہمراہ فیصلہ کن کارروائی کرنے کے لیے تیار ہیں۔

صدر بائیڈن نے کہا کہ امریکا روسی فوجی کارروائیوں کے نتیجے میں یوکرائن کی معیشت کو سہارا دینے کے لیے مائیکرو اکنامک تعاون بھی کرے گا۔ امریکا نے گزشتہ سال یوکرائن کو 50 لاکھ ڈالر کی ترقیاتی اور انسانی امداد بھی فراہم کی تھی۔

صدر بائیڈن نے کہا کہ سفارتی عملے کے ملک چھوڑنے کے باوجود کیف میں امریکی سفارتخانہ کھلا ہے اور کام کر رہا ہے۔

Advertisement

Had a long phone conversation with @POTUS. Discussed recent diplomatic efforts on de-escalation and agreed on joint actions for the future. Thanked President @JoeBiden for the ongoing military assistance. Possibilities for financial support to Ukraine were also discussed. pic.twitter.com/pAsQLYAuig

— Володимир Зеленський (@ZelenskyyUa) January 27, 2022

یوکرائن کے صدر ولودیمیر زیلنسکی نے بھی اپنے ٹوئٹر اکاؤنٹ پر صدر بائیڈن سے ملاقات کے حوالے سے ایک بیان جاری کیا ہے۔

صدر زیلنسکی کا کہنا ہے کہ بات چیت کافی طویل رہی جس میں ہم نے کشیدگی کو کم کرنے کے لیے سفارتی اقدامات پر تبادلہ خیال کیا اور مستقبل میں مشترکہ اقدامات اٹھانے پر اتفاق کیا ہے۔ میں نے صدر بائیڈن کی مسلسل عسکری امداد پر ان کا شکریہ ادا کیا ہے اور یوکرائن کو مالی مدد فراہم کرنے کے امکان پر بھی تبادلہ خیال کیا گیا ہے۔

وائٹ ہاؤس کی قومی سلامتی کونسل کی ترجمان ایملی ہورن نے ایک بیان میں کہا ہے کہ صدر بائیڈن کی صدر زیلنسکی سے فون پر گفتگو میں واضح کیا گیا ہے کہ اس بات کا قوی امکان ہے کہ روس اگلے ماہ یوکرائن پر حملہ کر سکتا ہے۔

ایملی ہورن نے کہا کہ صدر بائیڈن نے واضح کیا ہے کہ ہم کئی مہینوں سے اس حوالے سے عالمی رائے عامہ کو خبردار کر رہے ہیں۔

دوسری جانب امریکی نشریاتی ادارے سی این این کی رپورٹ کے مطابق ایک سینئر یوکرائنی اہلکار کا کہنا ہے کہ بات چیت خوشگوار نہیں تھی کیونکہ فریقین ممکنہ روسی حملے کے خطرے کی سطح پر متفق نہیں ہو سکے۔