وزیر خزانہ شوکت ترین نے دالوں کی قیمتوں میں اضافے پر تشویش کا اظہار کیا ہے۔

وزیر خزانہ شوکت ترین کی زیر صدارت نیشنل پرائس مانیٹرنگ کمیٹی کا اجلاس ہوا جس میں وفاقی وزراء، مشیروں، معاونین خصوصی اور وزارتوں کے سیکرٹریز نے شرکت کی۔

سیکرٹری خزانہ نے بریفنگ دیتے ہوئے بتایا کہ ہفتہ وار بنیادوں پر مہنگائی میں 0.08 فیصد اضافہ ہوا ، 22 اشیاء کی قیمتوں میں کمی، 22 میں استحکام اور 18 اشیاء کی قیمتوں میں اضافہ ہوا۔

سیکرٹری خزانہ نے بتایا کہ ٹماٹر 0.11 فیصد، مرچ پاؤڈر 0.26 اور انڈے 0.05 سستے ہوئے ، پیٹرولیم مصنوعات، چکن اور آلو کی قیمتیں بڑھیں ، ملک بھر میں آٹے کی قیمتوں میں استحکام برقرار ہے۔

کمیٹی نے اطمینان کا اظہار کرتے ہوئے کہا کہ ملک میں گندم کی وافر ذخائر بھی موجود ہیں ، ملک میں چینی کے ذخائر اور قیمتوں کا بھی جائزہ لیا گیا۔

اعلامیے کے مطابق دال مونگ کے سوا دیگر دالوں کی قیمتوں میں اضافے کا رجحان رہا۔

وزیر خزانہ شوکت ترین نے دالوں کی قیمتوں میں اضافے پر تشویش کا اظہار کیا اور قیمتوں پر کنٹرول کیلئے ہر ممکن ٹھوس اقدامات کی ہدایت دی۔