وفاقی وزیر اطلاعات چوہدری فواد حسین  نے کہا ہے کہ اس سال اوورسیز پاکستانیوں نے 31 ارب ڈالر پاکستان بھیجے۔

وفاقی وزیر اطلاعات چوہدری فواد حسین نے دبئی ایکسپو 2020ء میں پاکستان فلم فیسٹیول کے آغاز کے حوالے سے تقریب سے خطاب کرتے ہوئے کہا کہ اوورسیز پاکستانی ملک کا قیمتی اثاثہ ہیں، انہوں نے اس سال 31 ارب ڈالر پاکستان بھیجے۔

وفاقی وزیر اطلاعات نے کہا کہ یو اے ای سے پاکستانیوں نے روشن ڈیجیتل پاکستان کے ذریعے سب سے زیادہ رقوم وطن بھیجیں، اوورسیز پاکستانیوں کا پاکستان کی معیشت میں بڑا حصہ ہے۔

انہوں نے کہا کہ جس طرح اوورسیز پاکستانیز پاکستان کے ساتھ کھڑے ہیں، عمران خان بھی اسی طرح سمندر پار پاکستانیوں کے ساتھ کھڑے ہیں۔

 چوہدری فواد حسین نے کہا کہ ہم ہر وہ کام کریں گے جس سے پاکستانی پاسپورٹ کی عزت بڑھے، ہندوستان سے جو لوگ یہاں موجود ہیں ہم انہیں بھی خوش آمدید کہتے ہیں۔

ان کا کہنا تھا کہ مودی جی سے کہنا چاہتا ہوں کہ تم اپنے عقیدوں کے نیزے ہر دل میں اتارتے جاتے ہو، ہم لوگ محبت والے ہیں تم خنجر کیوں لہراتے ہو، ہم محبت والے لوگ ہیں، امن کی بات کرتے ہیں، ہم اس خطے کو آگے لے کر چلنا چاہتے ہیں۔

وزیر اطلاعات نے کہا کہ ہم چاہتے ہیں کہ پاکستان اور بھارت کے عوام امن و آشتی کے ساتھ رہیں، آج یہاں متحدہ عرب امارات سے بہت سے لوگ آئے جو امن کی نشانی ہے، میوزک، کلچر اور کرکٹ ہمیں ایک دوسرے سے جوڑتا ہے۔

انہوں نے کہا کہ ایکسپو میں ہم کل 11 پاکستانی فلمیں پیش کر رہے ہیں، تمام پاکستانی کل سے پاکستان پویلین روزانہ کی بنیادوں پر آئیں، ہر روز ایک نئی پاکستانی فلم آپ کی منتظر ہوگی۔

واضح رہے کہ 21 جنوری سے 26 فروری تک 11 پاکستانی فلمیں پاکستانی انکلوژر میں دکھائی جائیں گی۔