ڈسکہ میں ڈاکٹرز کے بجائے اوٹی اسسٹنٹ کی جانب سے مریض کا آپریشن کیے جانے کی ویڈیو وائرل ہوگئی۔

سیالکوٹ کی تحصیل ڈسکہ کے ایک اسپتال کے آپریشن تھیٹر کی ویڈیو سوشل میڈیا پر وائرل ہورہی ہے جس میں او ٹی اسسٹنٹ کو مریض کا آپریشن کرتے ہوئے دیکھا جاسکتا ہے۔

ڈسکہ کے اسپتال میں ڈاکٹرز کے بجائے او ٹی اسسٹنٹ نے ایک خاتون کا اپنڈکس کا آپریشن کیا اور پھر خود ہی ٹانگے بھی لگائے۔

دوسری جانب معاملہ میڈیا میں منظرعام پر آنے کے بعد ہیلتھ ڈیپارٹمنٹ حرکت میں آگیا اور او ٹی اسسٹنٹ سمیت پیرا میڈیکل اسٹاف کے 4 ارکان کو معطل کردیا گیا جس میں 3 نرس بھی شامل ہیں۔

ادھر متعلقہ حکام کی جانب سے 6 ڈاکٹرز کو بھی شوکاز نوٹس جاریے کردیے گئے ہیں۔  حکام کا کہنا ہے کہ معاملے کی انکوائری کریں گے اور ذمہ داروں کے خلاف کارروائی ہوگی۔

اس حوالے سے ڈاکٹر اسلم چوہدری کا کہنا تھا کہ مریض کو ڈھانپے بغیر کسی قسم کے آپریشن کی اجازت نہیں ہوتی، اس معاملے کی انکوائری کی جائے گی۔

ویڈیو سوشل میڈیا پر وائرل ہونے کے بعد سیالکوٹ کے شہریوں میں تشویش کی لہر توڑ گئی اور صارفین کی جانب سے اسپتال کے غیرذمہ دارانہ رویے پر شدید تنقید کی جارہی ہے جب کہ وہاں موجود ڈاکٹرز کو بھی معطل کرنے کے مطالبات سامنے آرہے ہیں۔