وزیر اعلیٰ پنجاب سردار عثمان بزدار نے خیر پور ٹامیوالی کے قریب ٹریفک حادثے میں قیمتی انسانی جانوں کے ضیاع  پر دکھ اور افسوس کا اظہار کیا ہے۔

تفصیلات کے مطابق وزیر اعلیٰ عثمان بزدار نے جاں بحق افراد کے لواحقین سے دلی ہمدردی و اظہارِ تعزیت کیا، ان کا کہنا تھا کہ زخمیوں کو علاج معالجے کی بہترین سہولتیں فراہم کی جائیں۔

  عثمان بزدار نے انتظامیہ کو ہسپتال پہنچ کر زخمیوں کے علاج معالجے کی خود نگرانی کی ہدایت دی، انہوں نے کمشنر بہاولپور اور آر پی او بہاولپور سے حادثے کے بارے میں رپورٹ طلب کر لی۔

وزیر اعلیٰ پنجاب سردار عثمان بزدار نے غفلت کے ذمہ دار ڈرائیور کے خلاف قانونی کارروائی کا حکم دے دیا۔

واضح رہے کہ خیر پور ٹامیوالی کے قریب ٹریفک حادثہ پیش آیا ہے جس کے نتیجے میں متعدد افراد زخمی ہوگئے ہیں۔

حادثے میں بس میں سوار غلام شبیر اے ایس آئی جاں بحق ہوگئے، حادثہ بسوں کے آپس میں ٹکرانے سے پیش آیا، پولیس کی بھاری نفری اور ریسکیو ادارے موقع پر موجود ہیں۔

ذرائع کا کہنا ہے کہ زخمیوں کو نکالنے اور طبی امداد کا کام جاری ہے، ڈی ایس پی خیر پور، ایس ایچ او خیرپور پولیس نفری کے ہمراہ موجود ہیں۔

ڈی پی او محمد فیصل کامران نے بتایا کہ زخمیوں کو فوری طبی امداد کیلئے ہسپتال منتقل کیا جا رہا ہے۔

ترجمان پولیس کے مطابق ڈی پی او کی ہدایت پر مزید نفری جائے حادثہ کیلئے روانہ ہوگئی ہے۔