پی ایس ایل 7 میں کورونا سے کھلاڑیوں سمیت گراؤنڈ اسٹاف اور کھلاڑیوں کے اہل خانہ بھی کورونا سے متاثر ہو رہے ہیں۔

پاکستان سپر لیگ کے سربراہ عثمان اور ان کی اہلیہ کورونا کے باعث دس روزہ قرنطینہ میں ہیں جبکہ سینئر افسر عون زیدی بھی ٹیسٹ مثبت آنے کے بعد آئسولیشن میں ہیں۔

پاکستان سپر لیگ کی انتظامیہ نے کورونا کیسز کی بڑھتی ہوئی شرح کے بعد اعلان کیا ہے کہ اب فرنچائز ٹیم کے 20 میں سے 12 کھلاڑیوں کے ساتھ بھی میچ شروع کیا جا سکے گا۔

کوئٹہ گلیڈی ایٹرز کے پانچ غیر ملکی کھلاڑی بھی کورونا سے متاثر ہیں اور آئسولیشن میں ہیں جبکہ کپتان سرفراز احمد کی والدہ اور اہلیہ بھی کورونا سے متاثر ہو چکی ہیں۔

کورونا کی موجودہ صورتحال اور پی ایس ایل پر کورونا کے جاری وار کے پیش نظر پی ایس ایل انتظامیہ نے کھلاڑیوں کے لئے ہوٹل میں ہی ببل بنانے کی تیاری شروع کر دی ہے۔

جبکہ پہلی بار گراؤنڈ اسٹاف کو بھی گھر جانے کی اجازت نہیں دی جائے گی، گراؤنڈ اسٹاف کو بھی کراچی کے ہائی پرفارمنس سینٹر میں قائم ببل میں رہنا ہو گا۔

پی ایس ایل کے انتظامات کے حوالے سے زیادہ تر میٹنگز بھی آن لائن ہو رہی ہیں اور باہمی میل ملاپ سے گریز کیا جا رہا ہے۔

واضح رہے کہ پی ایس ایل کے ساتویں ایڈیشن کا پہلا میچ کراچی کے نیشنل اسٹیڈیم میں کراچی کنگز اور دفاعی چمپئن ملتان سلطانز کے درمیان کھیلا جائے گا۔