فریال تالپور نےکہا ہے کہ پیپلز پارٹی کے دروازے ہر جمہوریت پسند کے لیے کھلے ہیں۔

پی پی پی شعبہ خواتین کی مرکزی صدر و ایم پی اے فریال تالپور کی زیرِ صدارت ضلع دادو کی لیڈیز ونگ کا اجلاس ہوا جس میں فیصلہ کیا گیا کہ لانگ مارچ میں ضلع دادو سے خواتین کی بھرپور شرکت کو یقینی بنایا جائے گا۔

اجلاس کے دوران لانگ مارچ کی تیاریوں، آئندہ بلدیاتی انتخابات اور تنظیمی معاملات کا جائزہ لیا گیا۔

فریال تالپور نے اجلاس کی صدارت کرتے ہوئےکہا کہ ضلع دادو کے جیالوں اور جیالیوں کا پارٹی کی ہر جدوجہد میں کردار محاذ پر اگلی صفوں کے سپاہیوں جیسا رہا ہے۔

 انہوں نے کہا کہ پیپلز پارٹی کی جدوجہد فیصلہ کُن مرحلے میں داخل ہوگئی ہے، جمہوریت کی جیت نوشتہ دیوار ہے، یقین ہے لانگ مارچ میں ضلع دادو سے خواتین بڑی تعداد میں شرکت کریں گی۔

فریال تالپور نے ایک کارکن کے سوال کا جواب دیتے ہوئے کہا کہ لیاقت جتوئی کی پارٹی میں شمولیت کا معاملہ زیرِ غور نہیں ہے، ایسی افواہوں میں کوئی صداقت نہیں۔

پی پی پی شعبہ خواتین کی مرکزی صدر و ایم پی اے فریال تالپور کا مزید کہنا تھا کہ پیپلز پارٹی کے دروازے ہر جمہوریت پسند کے لیے کھلے ہیں، پیپلز پارٹی کی قیادت نے ہمیشہ اپنے کارکنان کی رائے کو مقدم رکھا ہے۔

 زرداری ہاؤس کراچی میں ہونے والے اجلاس میں پی پی پی شعبہ خواتین ضلع دادو کی عہدیداران و کارکنان نے شرکت کی جبکہ اجلاس میں پی پی پی شعبہ خواتین سندھ کی صدر و ایم این اے شگفتہ جمانی اور ایم این اے مسرت مہیسر ، ایم پی ایز کلثوم چانڈیو، سجیلہ لغاری، ہیر سوہو اور سعدیہ جاوید اور تنظیمی عہدیدار شبانہ بھی موجود تھیں۔