اسلام آباد میں بلدیاتی انتخابات کے لئے الیکشن کمیشن کی جانب سے حلقہ بندیوں کی ابتدائی فہرست جاری کر دی گئی ہے۔

الیکشن کمیشن کی جانب سے جاری کی گئی حلقہ بندیوں کی ابتدائی فہرست کے مطابق اسلام آباد میں 100 نیبرہڈ کونسلیں تشکیل دی گئی ہیں۔

الیکشن کمیشن کی جانب سے جاری کیے جانے والے اعلامیے کے مطابق ہر نیبرہڈ کونسل کے اندر چار وارڈز بنائے گئے ہیں، حلقہ بندیوں کی ابتدائی فہرست کو آویزاں کر دیا گیا ہے۔

الیکشن کمیشن کا کہنا ہے کہ اس حوالے سے ان پر تجاویز اور اعتراضات 9 جنوری تا 23 جنوری 2022 تک دائر کیے جا سکتے ہیں۔

الیکشن کمیشن کے مطابق حلقہ بندی اتھارٹی 24 جنوری تا 7 فروری 2022 تک تجاویز اور اعتراضات کو نمٹائے گی۔

الیکشن کمیشن کا کہنا ہے کہ نیبرہڈ کونسلوں اور وارڈ کے حتمی حلقہ بندی کی فہرست 16 فروری 2022 کو جاری کی جائے گی۔