شبلی فراز نے کہا ہے کہ الیکشن کمیشن ہی الیکٹرونک ووٹنگ مشین کی سلیکشن اور خریداری کا مجاز ہے۔

وفاقی وزیر سائئنس اینڈ ٹیکنالوجی سنیٹر شبلی فراز نے میڈیا سے گفتگو کرتے ہوئے کہا کہ الیکشن کمیشن کو باضابطہ طور پر آگاہ کر دیا گیا کہ وہ بلدیاتی انتخابات کے لئے الیکٹرانک مشینوں کی خریداری کا مجاز ہے۔

 انہوں نے کہا کہ الیکشن کمیشن ہی الیکٹرونک ووٹنگ مشین کی سلیکشن اور خریداری کا مجاز ہے، الیکشن کمیشن بلدیاتی انتخابات کے لئے ٹنڈر جاری کرے اور مشینیں خریدے۔

شبلی فراز کا کہنا تھا کہ وزارت سائنس اینڈ ٹیکنالوجی نے ای وی ایم کا تصور دیا، ہم خود سے مشین نہیں بناتے، ہم نے ثابت کیا کہ عوامی مزاج کے مطابق ای وی ایم مشین مقامی طور پر تیار ہوسکتی ہے۔

ان کا یہ بھی کہنا تھا کہ ہم نے چیف الیکشن کمشنر سے درخواست کی کہ مشینوں کی خریداری کرے، الیکشن کمیشن جس مشین کو بہتر سمجھتی ہے، وہی خریدے۔

وفاقی وزیر سائئنس اینڈ ٹیکنالوجی سنیٹر شبلی فراز کا مزید کہنا تھا کہ مشینوں کی اسٹوریج کیلئےالیکشن کمیشن کو پانچ سو میٹر کی حدود میں جگہ آفر کی ہے، ہمارا کام الیکشن کمیشن سے تعاون کرنا ہے۔