وزیراعلیٰ سندھ سید مراد علی شاہ کی جانب سے تھر کول فیلڈ بلاک1 سے کوئلہ برآمد ہونے پر پورے ملک کے عوام کو مبارکباد پیش کی گئی ہے۔

تھرکول فیلڈ بلاک ون سے کوئلہ برآمد ہونے پر سید مراد علی شاہ نے عوام کو مبارکباد پیش کرتے ہوئے کہا کہ شہید بینظیر بھٹو کے وژن کے مطابق یہ سندھ حکومت کی دوسری بڑی کامیابی ہے۔

وزیراعلیٰ سندھ نے کہا کہ تھر کول فیلڈ بلاک 1 میں تین ارب ٹن کوئلہ کے ذخائر ہیں جو پانچ ارب بیرل خام تیل کے برابر ہیں۔

مراد علی شاہ کا کہنا تھا کہ ہم ہمیشہ کہتے ہیں تھر بدلے گا پاکستان،آج یہ نعرہ حقیقت بنتا جارہا ہے۔

وزیراعلیٰ سندھ سید مراد علی شاہ کا مزید کہنا تھا کہ آج صبح بلاک 1 میں 145 میٹر کھدائی کے بعد کوئلہ نکلا ہے، میں چائنا کمپنی کو بھی انکی کامیابی پر مبارکباد دیتا ہوں۔

واضح رہے اس سے قبل تھرکول منصوبے بلاک ون پر کام کرنی والی کمپنی کی کھدائی کا کام مکمل ہوگیا، کمپنی کی انتظامیہ نے کول تک پہنچ کر اہم سنگ میل عبور کرلیا ہے۔

ماہرین کا کہنا ہے کہ بلاک ون میں 3 بلین ٹن یا 5 بلین بیرل خام تیل کے مساوی ذخائر ہیں، تھر کول بلاک ون انتظامیہ کا کہنا ہے کہ پہلے مرحلے میں سالانہ پیداوار7.8 ملین ٹن ہے، انتظامیہ کے مطابق بلاک ون کی سی پیک کے تحت درجہ بندی کی گئی ہے۔